Jer men Mars 4,5 mıllıard jyl buryn Kún júıesinde qatar ornalassa da, múlde bólek senarılermen paıda bolǵan. Kopengagen ýnıversıtetiniń zertteýshileri eki planetanyń mantıasynyń hımıalyq quramyn zerttep, osyndaı tujyrymǵa keldi, dep habarlaıdy infohub.kz saıty.
SciTechDaily jazýynsha, eki aspan denesiniń massasy ártúrli qurylys materıalynan jınalǵan. Jerdiń shamamen 75%-y jas protoplanetalardyń usaq ǵaryshtyq qıyrshyq tastardy ustap qalýy esebinen jınalǵan zattan turady. Qalǵan shırek massasy planetaǵa iri asteroıd tárizdes deneler — planezımaldarmen soqtyǵysýdan jetken.
Marstaǵy jaǵdaı kerisinshe bolyp shyqty. Qyzyl planeta massasynyń tórtten úshke jýyǵy dál iri planezımaldardyń soqtyǵysyp birigýiniń arqasynda qalyptassa, qalǵan shıregi ǵana usaq bólshekterdiń birtindep ustalýyna tıesili.
Jumys barysynda zertteýshiler kompúterlik modeldeýdi qoldanyp, natrı, myrysh jáne kalı sıaqty ushpa elementterdiń mólsherin baǵalady. Bul hımıalyq izder mıllıardtaǵan jyl boıy saqtalyp, aspan deneleriniń qalyptasý jaǵdaılaryn dálirek anyqtaýǵa múmkindik beredi.
Avtorlardyń pikirinshe, bul ashylym astronomdarǵa bizdiń júıeden tys ekzoplanetalardyń sý qoryn jáne tirshilikke jaramdylyq áleýetin dálirek baǵalaýǵa kómektesedi.