Almaty turǵyndary jer asty dúmpýin sezip, prezıdenttik habarlama alǵan soń, kópshiligi ǵımarattar men páterlerin tastap shyqty. Áleýmettik jelilerde 12-qabattan, sondaı-aq mektepter men ýnıversıtetterden evakýasıalanǵan sátterdiń vıdeolary paıda boldy, dep habarlaıdy infohub.kz saıty.
Jelide almatylyqtardyń jer silkinisinen keıin páterlerinen kóshege shyǵyp jatqan vıdeolary tarady. Keıbireýleri 12-qabattan tústi. Oqý oryndarynda da evakýasıa júrgizildi: bir rolıkte oqýshylardyń baspaldaqpen jappaı tómendep bara jatqany kórinedi.
Threads áleýmettik jelisinde almatylyqtar jer silkinisi týraly habarlamalar jazyp, evakýasıa qalaı ótkenin aıtty. «Almatyda jer silkinisi boldy. Kim sezdi? Biz jumysta óz betimizshe kóshege shyqtyq. Keıbir patrıottar keńsede qalyp qoıypty», — dep jazdy bir qyz.
«Almaty, búgin bizde qatty jer silkinisi boldy, biraq balalar ádettegideı kerek sátte bárin júıeli ári naqty jasady. Búkil mekteptiń evakýasıasy tez, naqty jáne qaýipsiz ótti. Balalar ózderi turyp oınap jatyr», — dep atap ótti muǵalim áleýmettik jelide.
«Habarlama ádettegideı kesh keldi... Kórshilerdiń bári syrtqa shyqty, jaqyn mańdaǵy mekteptiń barlyq oqýshysyn da alyp shyqty», — dedi taǵy bir qoldanýshy.
Ýnıversıtetterde de oqý prosesi toqtatyldy. Bul týraly ashilova1165 habarlady. «Qatty dúmpý sezdik. Balalar qatty qoryqty. Biz tórtinshi qabattamyz, bizdi qatty shaıqady. Dúrbeleńsiz birden kóshege shyqtyq. Qolym áli dirildep tur, kútpegen jerden boldy», — dep áńgimeledi oqytýshy.
osmanov.i.z degen qoldanýshy habarlama alǵan soń birden kóshege shyqqanyn jazdy. «Sırenany jer silkinisinen keıin ǵana estidik. Eki qatty dúmpý boldy. Qalanyń ortalyǵyndamyz. Shyǵys bóligin onsha shaıqamaǵan deıdi, KAMAZ ótip ketkendeı boldy», — dep aıtty er adam.
Keıbireýler jer silkinisin páterde otyryp sezdi. Jer asty dúmpýiniń sáti beınebaqylaý kamerasyna túsip qaldy.
Eske salaıyq, buǵan deıin QR TJM «SJǴZOjI» JSHS-niń seısmıkalyq stansıalar jelisi jer silkinisin tirkegen bolatyn. Seısmıkalyq oqıǵa Almaty qalasynda tirkelgeni habarlandy. Keıinirek Almatydaǵy sezilý deńgeıi 3-4 bal bolǵany belgili boldy. Sondaı-aq dúmpýler Qaskeleńde — 2-3 bal; Boraldaı 19 km — 2-3 bal; Ótegen batyr 28 km — 2 bal boldy. Keıin TJ mınıstrligi Almatydaǵy jer silkinisi týraly derekterdi jarıalady — megapolıstegi jáne oblystaǵy sezilý deńgeıi belgili boldy.