Senbige qaraǵan túnde Vıktorıa shtatynda 4.8 magnıtýdalyq jer silkinisi bolyp, Melbýrn men aınalasyndaǵy turǵyndardy oıatty, dep habarlaıdy infohub.kz saıty.
Avstralıanyń geoǵylym qyzmetiniń málimetinshe, jer silkinisi jergilikti ýaqytpen tańǵy 2.01-de Melbýrnnen ońtústik-shyǵysqa qaraı 130 shaqyrym jerdegi Leongata mańynda tirkeldi. Aldyn ala boljam boıynsha magnıtýdasy 4.8 boldy. Dúmpý qalanyń shyǵys aýdandarynda da anyq sezildi.
Geoǵylym qyzmeti myńdaǵan adamnan jer silkinisin sezgeni týraly habarlama kelip túskenin málimdedi. Narre-Ýorren turǵyny Braıan Morlı áleýmettik jelidegi paraqshasynda «sezdim, meni oıatty» dep jazsa, Tereza Stıvens «Garfıldtegi úıimizdi shaıqady» dep habarlady. Basqa jazbalardan dúmpýdiń Preston, Haıdelberg-Haıts, Venýs-Beı jáne Melbýrnniń taǵy da kóptegen bólikterinde sezilgeni baıqalady.
Jer silkinisiniń oshaǵy jer betinen shamamen 10 shaqyrym tereńdikte bolǵan.
Vıktorıa shtatynyń tótenshe jaǵdaılar qyzmeti bul jer silkinisin jer silkinisi kezinde saqtalatyn qaǵıdalardy eske salýǵa tıimdi múmkindik dep atady: jerge eńkeıip, berik jıhazdyń astyna tyǵylyp, bas pen moıyndy qorǵap, shaıqalý toqtaǵansha sol kúıde qalý qajet.
Meteorologıa búrosy jer silkinisinen sýnamı qaýpi joq ekenin habarlady.