Qazaqstanda Túrkistan oblysynyń Jetisaı qalasyndaǵy toıda aıtqan tilegi qoǵamda keń rezonans týdyrǵan er adam ustaldy. Merekeden túsirilgen vıdeo áleýmettik jelige tarap, quqyq qorǵaý organdarynyń nazaryn aýdardy, dep habarlaıdy infohub.kz.
«QR İİM jańalyqtary» Telegram-arnasynda habarlanǵandaı, Túrkistan oblysynyń 66 jastaǵy turǵynynyń kópshilik aldynda aıtqan sózderi jazylǵan beınejazbanyń taratylýyna baılanysty dinı jáne áleýmettik alaýyzdyqty qozdyrý belgileri boıynsha qylmystyq is qozǵaldy. Kúdikti ustalyp, ýaqytsha ustaý ızolátoryna qamaldy.
Vedomstvo Qazaqstan Respýblıkasynyń Konstıtýsıasy memlekettiń zaıyrly, quqyqtyq jáne áleýmettik sıpatyn bekitetinin, onda adam, onyń quqyqtary men bostandyqtary eń joǵary qundylyq bolyp tabylatynyn (1-bap) eske saldy. Barlyǵy zań aldynda teń, al kez kelgen kemsitýshilik, onyń ishinde jynysy men dinge qatynasy boıynsha da tyıym salynady (16-bap). Sonymen qatar sóz bostandyǵy basqa adamdardyń ar-namysy men qadir-qasıetine qol suǵýǵa tıis emes, al dinı jáne áleýmettik alaýyzdyqty nasıhattaýǵa jol berilmeıdi (23-bap).
İİM kez kelgen kópshilik aldynda aıtylǵan, adamnyń qadir-qasıetin kemsitetin, áıelderdi qorlaıtyn, dinı nemese áleýmettik alaýyzdyqty qozdyratyn ne qoǵamdyq kelisimdi buzýǵa baǵyttalǵan sózder zańǵa sáıkes quqyqtyq baǵalanatynyn eskertti.
Eske salaıyq, beıneni ánshi Roza Alqoja Instagram-daǵy paraqshasynda jarıalaǵan. Ol mereke Jetisaıda ótkenin, al tilekti qalyńdyqtyń týysy aıtqanyn atap ótti. Er adam toılarda аlkogólden bas tartqannan keıin taǵy eki qadam jasaý kerektigin aıtqan: «Birinshiden, mýzykadan arylý kerek. Ekinshiden, erler men áıelder bólek otyrýy tıis. Ánshiler meni keshirsin. Eger toılardy ánshilersiz ótkizse, olar juldyz bolýdan qalady jáne tanymaldylyǵyn joǵaltady. Sharıǵatta olardy "shaıtannyń jarshysy" dep ataıdy».
Ánshiniń pikirinshe, mundaı sózder er adamnyń destrýktıvti dinı aǵymdardyń birine jaqyndyǵyn kórsetýi múmkin. Mereke qonaǵynyń sózine QR Prezıdenti Ákimshiligi basshysynyń birinshi orynbasary Erlan Qarın jáne QMDB ókilderi jaýap berdi.