Jetisý oblysynyń Aqsý aýdanynda áıelder arasynda janjal bolyp, onyń biri ekinshisin polısıa qyzmetkeriniń kózinshe betinen tepken. Oqıǵa beınekameraǵa túsip, «Krımınalnyı Kazahstan» Telegram-arnasynda jarıalanǵan, dep habarlaıdy infohub.kz.
Basylymdaǵy málimetke sáıkes, satýshylar arasyndaǵy janjal tóbeleske ulasqan. Kadrlarda bir áıel jerde jatqan qarsylasyna jaqyndap, ony betinen tepkeni kórinedi, al qasynda polısıa qyzmetkeri tur. Zardap shekken áıel aýrýhanaǵa jetkizilgeni aıtylady.
Jetisý oblysy polısıa departamentiniń baspasóz qyzmeti NUR.KZ tilshisine uryp-soǵý faktisi boıynsha qylmystyq is qozǵalǵanyn habarlady. Oqıǵaǵa qatysýshylardyń barlyǵy anyqtalyp, aýdandyq polısıa bólimine jetkizilgen. Aldyn ala málimet boıynsha, kúdikti men jábirlenýshi buryn tanys bolǵan.
Qazirgi ýaqytta oqıǵanyń barlyq mán-jaıyn anyqtaý jáne janjalǵa qatysýshylardyń áreketterine quqyqtyq baǵa berý úshin qajetti tergeý amaldary júrgizilýde.
«Tergeý nátıjeleri boıynsha Qazaqstan Respýblıkasynyń qoldanystaǵy zańnamasyna sáıkes prosesýaldyq sheshim qabyldanady. Qazaqstan Respýblıkasy Qylmystyq-prosestik kodeksiniń 201-babyna sáıkes ózge aqparat tergeý múddesine oraı jarıa etilmeıdi», — dep málimdedi vedomstvodan.