Jetisý oblysynyń Aqsý aýdanynda jergilikti satýshylar arasyndaǵy turmystyq janjal tóbeleske ulasyp, nátıjesinde bir áıel aýrýhanaǵa jatqyzyldy. Oqıǵa polısıa qyzmetkeriniń kóz aldynda bolǵan, al oqıǵanyń vıdeosyn «Krımınalnyı Kazahstan» Telegram-arnasy taratqan... dep habarlaıdy infohub.kz saıty.
Kadrlarda janjalǵa qatysýshylardyń biri jerde jatqan áıelge jaqyndap, onyń betine aıaǵymen tepkilegeni kórinedi. Sol sátte qasynda polısıa qyzmetkeri tur.
Jergilikti turǵyndardyń aıtýynsha, janjaldyń sebebi satyp alýshylar úshin básekelestik bolýy múmkin. Satýshylardyń bir bóligi arnaıy jabdyqtalǵan bazarǵa aýystyrylǵannan keıin jaǵdaı ýshyqqan.
Nátıjesinde áıelderdiń biri jaraqat alyp, aýrýhanaǵa jetkizildi.
Jetisý oblysy polısıa departamentiniń málimetinshe, uryp-soǵý faktisi boıynsha qylmystyq is qozǵaldy. Oqıǵaǵa qatysýshylardyń barlyǵy anyqtalyp, aýdandyq polısıa bólimine jetkizildi.
Aldyn ala derekter boıynsha, kúdikti men jábirlenýshi buryn tanys bolǵan.
«Qazirgi ýaqytta oqıǵanyń barlyq mán-jaıyn anyqtaýǵa jáne janjalǵa qatysýshylardyń áreketterine quqyqtyq baǵa berýge baǵyttalǵan qajetti tergeý áreketteri júrgizilýde», — dep habarlady oblystyq polısıa departamenti.
Tergeý qorytyndysy boıynsha zańnamaǵa sáıkes prosesýaldyq sheshim qabyldanady.
Buǵan deıin «Kýrsıv» Aqtóbe oblysynda 26 jastaǵy er adam toıǵa qonaq retinde baryp, tóbelesten keıin qaıtys bolǵanyn jazǵan. Oqıǵa boıynsha qylmystyq is qozǵalyp, kúdikti ustalyp, ýaqytsha ustaý ızolátoryna qamalǵan.