Jetisý oblysynyń turǵyndaryna 25 qyrkúıekte ótetin oblystyq eskertý júıesin aýqymdy tekserý týraly eskertildi. Tótenshe jaǵdaılar departamentiniń naqtylaýynsha, jergilikti ýaqytpen saǵat 11:55-te óńirdiń búkil aýmaǵynda elektrosırenalar qosylyp, uıaly telefondarǵa synaq habarlamasy keledi, dep habarlaıdy infohub.kz saıty.
Vedomstvonyń dereginshe, is-shara tolyǵymen tehnıkalyq sıpatta jáne oblystyq eskertý júıesiniń jumys qabiletin tekserýge baǵyttalǵan. Elektrosırenalardan bólek, «Cell Broadcast» tehnologıasymen jumys isteıtin «Mass Alert» jedel eskertý júıesi de iske qosylady — oblys aýmaǵyna synaq habarlamasy dál sol arqyly jiberiledi.
«Osyǵan baılanysty úreıge berilmeýge jáne ótip jatqan is-sharaǵa túsinistikpen qaraýǵa suraımyz. Sondaı-aq Jetisý oblysynyń TJD tótenshe jaǵdaılar týyndaǵan kezde elektrosırenalar iske qosylǵandaǵy áreket tártibin eske salady», — delingen habarlamada.
Departament naqty tótenshe jaǵdaı kezinde elektrosırenalar iske qosylǵanda qalaı áreket etý kerektigin de eske saldy. Eger sıgnal adamdy úıde turǵanda tapsa, radıo men teledıdardy qosyp, shuǵyl habarlamany muqıat tyńdap, berilgen aqparatqa sáıkes áreket etý qajet.
Kóshede júrgender úshin basqa tártip qarastyrylǵan: kóshe daýys zoraıtqyshtary men uıaly eskertý quraldary arqyly beriletin shuǵyl habarlamany tyńdap, sodan keıin jetkizilgen habarlamaǵa saı áreket etý kerek.
Jetisý oblysynyń TJD sabyr saqtap, resmı aqparatty qadaǵalaýdy usynady.