Jetisý oblysynda Tekelı qalasynyń jańa ákimi taǵaıyndaldy. Ol — buǵan deıin energetıka jáne turǵyn úı-kommýnaldyq sharýashylyq basqarmasyn basqarǵan 44 jastaǵy Aıdos Beketaev, dep habarlaıdy infohub.kz saıty.
Oblys ákimdiginiń resmı saıtynda habarlanǵandaı, Prezıdent Ákimshiligimen jáne qalalyq máslıhat depýtattarymen kelisilgen soń, Tekelı qalasynyń ákimi bolyp 44 jastaǵy Aıdos Beketaev taǵaıyndaldy. Jańa basshyny qala aktıvine oblys ákimi Beıbit Isabaev tanystyrdy.
Oblys basshysy Tekelı qalasynyń ákimi qyzmetin tórt jyl atqaryp, basqa jumysqa aýysýyna baılanysty qyzmetten bosatylǵan Almas Ádilge qalanyń áleýmettik-ekonomıkalyq damýyna qosqan úlesi úshin alǵys bildirdi.
Aıdos Beketaev 1982 jyly dúnıege kelgen. Joǵary bilimdi. Ol «Turan» ýnıversıtetin, Jansúgirov atyndaǵy Jetisý memlekettik ýnıversıtetin, Serikbaev atyndaǵy Shyǵys Qazaqstan tehnıkalyq ýnıversıtetin «qarjy», «memlekettik jáne jergilikti basqarý» mamandyqtary boıynsha bitirgen, tehnıka jáne tehnologıa magıstri.
Eńbek jolyn Almatydaǵy «Ersak» JSHS-niń menedjeri retinde bastaǵan. Memlekettik qyzmette 2010 jyldan beri jumys isteıdi. Ár jyldary kóriktendirý bóliminiń bas mamany, ákim apparatynyń komýnaldyq sharýashylyq bóliminiń basshysy, Almaty qalasy Túrksib aýdany ákiminiń orynbasary qyzmetterin atqarǵan.
2023 jyldyń qazan aıynan osy taǵaıyndaýǵa deıin Jetisý oblysynyń energetıka jáne turǵyn úı-kommýnaldyq sharýashylyq basqarmasynyń basshysy boldy.