Jezqazǵan ákimi Qaırat Shaıjanov memlekettik qyzmetten ketetinin jarıalady. Burynǵy qala basshysy búgin qala turǵyndaryna arnap úndeý jarıalap, atqarǵan jumysynyń qorytyndysyn shyǵardy, dep habarlaıdy infohub.kz saıty.
Eks-ákimniń aıtýynsha, qala basshylyǵyndaǵy jumys kezeńi zor jaýapkershilikpen qatar júrip, ol úshin basqarýshylyq mektep bolǵan.
«Osy ýaqyt ishinde biz birge kóptegen máseleni kóterdik, birge kóptegen bastamany júzege asyrdyq. Sizder qoldaǵan jerde men kúsheıdim, syn tastaǵan jerde odan ári shyńdaldym», — dedi Qaırat Shaıjanov óz málimdemesinde.
Ol sondaı-aq qala turǵyndaryna senim bildirgeni úshin alǵys aıtyp, Jezqazǵan ol úshin jaı jumys orny emes, taǵdyry men eńbek jolymen tyǵyz baılanysqan týǵan qala ekenin atap ótti.
Qaırat Shaıjanov 1977 jyly 22 shildede dúnıege kelgen. Eki baǵyt boıynsha joǵary bilimi bar: «Ónerkásiptik jáne azamattyq qurylys» jáne «Quqyqtaný». Eńbek jolyn jeke sektorda bastap, qurylys kompanıalarynda basshylyq qyzmetter atqarǵan. Memlekettik jáne kvazımemlekettik basqarý júıesinde mol tájirıbesi bar. 2007 jyly Sátbaev qalasyndaǵy Jezqazǵan kentiniń ákimi bolyp, keıin Sátbaev ákiminiń orynbasary qyzmetin atqardy.
2013 jyly Astanadaǵy «Turǵyn úı-kommýnaldyq sharýashylyqty jańǵyrtý jáne damytý qazaqstandyq ortalyǵy» AQ-nyń komýnaldyq sharýashylyq departamentiniń basshysy boldy. Keıin salalyq ǵylymı-tehnıkalyq ortalyqtyń bas dırektory atandy. 2015 jylǵy qarashadan 2017 jylǵy maýsymǵa deıin Qaraǵandy oblysy Osakarov aýdanynyń ákimi qyzmetinde boldy. 2015 jyly «Álem-stroı» JSHS-in de az ýaqyt basqardy.
Qaırat Shaıjanov Jezqazǵan qalasynyń ákimi qyzmetin 2022 jylǵy maýsymnan bastap atqaryp, bul qyzmette tórt jyl eńbek etti.