Jezqazǵan-Qyzylorda avtomobıl jolyn jańǵyrtyp, onyń búkil boıymen qozǵalysty ashý jaqyn aılarda aıaqtalady. Bul týraly Ulytaý oblysynyń ákimi Eset Baıken málimdedi, dep habarlaıdy infohub.kz saıty.
«Jezqazǵan-Qyzylorda» avtojolyndaǵy jumystar 90 paıyzǵa oryndaldy. Jaqyn aılarda qozǵalys ashylady dep josparlanyp otyr. «Jezqazǵan – Qaraǵandy» baǵytynda bıyl topyraq tóseý jáne materıaldyq-tehnıkalyq qamtamasyz etý jumystary tolyq aıaqtalady. Sonymen qatar «Ulytaý-Arqalyq» jolynyń 89 shaqyrymdyq bóligindegi jóndeý qazan aıynda bitedi», – dep keltiredi ákimniń sózin onyń baspasóz qyzmeti.
Eset Baıken oblys ortalyǵy – Jezqazǵan qalasyndaǵy vokzaldyń ashylý saltanatynda sóz sóıledi. Budan bólek, Qyzyljar, Qarajal jáne Jańaarqa stansıalaryndaǵy vokzaldardy jańǵyrtý aıaqtaldy. Qazirgi tańda Ulytaý oblysy Qazaqstannyń alty oblysymen temirjol qatynasymen baılanysqan. Jańǵyrtylǵan vokzaldar óńir turǵyndary men oblys qonaqtaryna qolaıly ári qaýipsiz jaǵdaı jasaýǵa múmkindik beredi.
Ákim vokzaldardy jańǵyrtý óńirdiń kólik ınfraqurylymyn damytýdaǵy mańyzdy qadam ekenin atap ótti. Qazirgi tańda eldiń tranzıttik áleýetin arttyratyn Qyzyljar-Moıynty temirjol jelisiniń qurylysy da júrip jatyr.
Buǵan deıin qazaqstandyqtar áleýmettik jelilerde eki oblys ortalyǵyn eń qysqa jolmen jalǵaıtyn Jezqazǵan-Qyzylorda avtojolynyń nashar jaǵdaıyna birneshe ret shaǵymdanǵan. Bul jol Qyzylordadan Astanaǵa, odan ári eldiń soltústigine nemese Reseı Federasıasyna qysqa jolmen jetýge múmkindik beredi. Alaıda jol tóseminiń sapasyzdyǵynan, al jańǵyrtý bastalǵan soń jekelegen ýchaskelerdegi aınalma joldarǵa baılanysty júrgizýshiler eldiń ońtústigi arqyly uzaǵyraq joldy (ońtústik, Balqash jáne Qaraǵandy arqyly shamamen 2 myń km) tańdaıdy.
Jezqazǵan-Qyzylorda avtojolynyń uzyndyǵy 424 km, onyń 216 shaqyrymy Qyzylorda oblysyna tıesili. 2025 jyldyń qarashasynda Qyzylorda oblysynyń ákimi Nurlybek Nálibaev (qazir QR birinshi vıse-premeri) Qyzylorda oblysyndaǵy 216 shaqyrymdyq ýchaskeniń rekonstrýksıasy aıaqtalǵanyn habarlaǵan. Ulytaý oblysyndaǵy ýchaske áli jumys ústinde. Jezqazǵan-Qyzylorda avtojolyn jańǵyrtý jumystary 2022 jyly bastalǵan.