Ulytaý oblysynyń ortalyǵy Jezqazǵan qalasynda aýqymdy jańǵyrtýdan keıin temirjol vokzaly saltanatty túrde ashyldy, dep habarlaıdy infohub.kz saıty.
Ashylý rásimine Ulytaý oblysynyń ákimi Eset Baıken, Qazaqstan Respýblıkasy Kólik mınıstrliginiń temirjol jáne sý kóligi komıtetiniń tóraǵasy Nurjan Kelbýǵanov, «Qazaqstan temir joly» ulttyq kompanıasy» aksıonerlik qoǵamynyń ókilderi, merdiger uıym jáne qala turǵyndary qatysty.
Nurjan Kelbýǵanov Jezqazǵan vokzalyn jańartý memleket basshysynyń tapsyrmasymen 124 temirjol vokzalyn jańǵyrtý men jańartý jónindegi aýqymdy baǵdarlama aıasynda júzege asyrylǵanyn atap ótti.
Jezqazǵan temirjol vokzaly 1941 jyly salynǵan. Jańǵyrtý nátıjesinde eki qabatty ǵımarattyń aýdany 582 sharshy metrden 2,5 myń sharshy metrge ulǵaıyp, nysannyń fýnksıonaldyq múmkindikterin edáýir keńeıtýge jáne jolaýshylarǵa qolaıly jaǵdaı jasaýǵa múmkindik berdi.
Jańǵyrtý barysynda jańa kótergish qańqa, qabyrǵalar men jabyndar turǵyzylyp, shatyr tolyǵymen jańartyldy. Sýmen jabdyqtaý, káriz, jylýmen jabdyqtaý, elektrmen jabdyqtaý jáne baılanys júıelerin qosa alǵanda, syrtqy jáne ishki ınjenerlik jelilerdi tartý boıynsha keshendi jumystar atqaryldy. Vokzal ortalyq jylytý júıesine qosyldy.
Sondaı-aq ǵımarattyń qasbeti men ishki úı-jaılary tolyǵymen jańartyldy. Jańa tereze bloktary men vıtrajdar ornatylyp, zamanaýı tozýǵa tózimdi, uzaqqa shydaıtyn jáne ońaı jýylatyn árleý materıaldary qoldanyldy. Úı-jaılarda aspaly tóbeler ornatylyp, edender keramogranıt jáne komersıalyq lınoleýmmen qaptaldy.
Jańǵyrtý barysynda aınaladaǵy aýmaqqa brýschatka tóselip, qalqa men jolaýshylar perrony jańartylyp, jańa qorshaýlar, jıhaz jáne qajetti jabdyqtar ornatyldy. Jolaýshylardyń qaýipsizdigin qamtamasyz etý maqsatynda órt qaýipsizdigi talaptaryna sáıkes qosymsha evakýasıalyq joldar jasalyp, jańa evakýasıalyq esikter ornatyldy.
Vokzaldyń táýliktik ortasha jolaýshy aǵyny shamamen 1 800 adamdy quraıdy. Stansıa arqyly Jezqazǵandy Astana, Almaty, Pavlodar, Qyzylorda jáne Qaraǵandymen baılanystyratyn 12 poıyz ótedi.
Vokzaldy jańǵyrtý jolaýshylarǵa qyzmet kórsetý sapasyn arttyryp, olarǵa zamanaýı ári qolaıly jaǵdaı jasaýǵa, sondaı-aq Ulytaý oblysynyń kólik ınfraqurylymyn odan ári damytýǵa múmkindik beredi. Buǵan deıin óńirde Qarajal, Jańaarqa jáne Qyzyljar stansıalaryndaǵy vokzaldardy jańǵyrtý aıaqtalǵan.
«Qazaqstan temir joly» (QTJ, «Samuryq-Qazyna» kompanıasynyń 100 paıyzdyq enshiles kásiporny) temirjol vokzaldaryn jańǵyrtýǵa jumsaǵan shyǵyndary Ulttyq ekonomıka mınıstrliginiń Tabıǵı monopolıalardy retteý komıteti ulttyq kompanıanyń tarıfterdi kóterý jónindegi ótinimin qaraý kezinde eskerilmegenin QTJ «Kýrsıvke» habarlady.
Buǵan deıin QTJ vokzaldardy jańǵyrtýǵa 168 mlrd teńge qaryz qarajatyn jumsaýdy josparlap otyrǵanyn málimdegen. Tarıfterdi ózgertýge ótinim berý kezinde kompanıa vokzaldardy jańǵyrtý jobalarynyń barlyǵy boıynsha banktermen sharttar usynǵan, olardyń keıbiri Reseı ımperıasy kezinde salynǵan. Kólik mınıstrligi elimizdegi 124 vokzalda QTJ qarajaty esebinen jańǵyrtý júrgiziletinin habarlaǵan.