Qazaqstandaǵy respýblıkalyq avtojolda túngi ýaqytta júk kóligi joldyń belgilenbegen jerinen shyqqan iri qara mal tabynymen soqtyǵysty. Oqıǵany jasandy ıntellekt kameralary tirkep, qaýipti jaǵdaıdy der kezinde anyqtap, aqparatty operatorlarǵa jetkizdi, al oqıǵa ornyna jol qyzmetteri jiberildi, dep habarlaıdy infohub.kz saıty.
«QazAvtoJol» málimdegendeı, respýblıkalyq joldar boıyndaǵy qaýipti ýchaskelerde maldyń jolǵa shyǵýyna kedergi bolatyn qorǵanysh torly qorshaýlar ornatylyp jatyr. Alaıda másele sheshilmeı otyr: keıbir ıeler maldy qaraýsyz qaldyrady, sondaı-aq jol qorshaýlarynyń elementterin búldirý jáne urlaý derekteri tirkelýde.
Kompanıa aýyl sharýashylyǵy maldarynyń ıelerine maldy qaraýsyz qaldyrmaýǵa jáne onyń avtomobıl joldaryna shyǵýyna jol bermeýge shaqyrdy. «Túnde júrgizýshi maldy soqtyǵysqanǵa deıin birneshe sekýnd qana kóredi. Adamdardyń ómiri qaýipte qalady», — delingen habarlamada.
«QazAvtoJol» jeke-dara azamattarǵa da úndeý tastap, jol qorshaýyn urlaý nemese búldirý — bul jaı ǵana múlikke keltirilgen zıan emes ekenin atap ótti. Ashyq qalǵan ýchaske maldyń trassaǵa shyǵatyn ornyna aınalyp, aýyr JKO-ǵa sebep bolýy múmkin.
Júrgizýshilerden «Mal aıdaý» jáne «Jabaıy janýarlar» jol belgileri qoıylǵan ýchaskelerde, ásirese túngi ýaqytta jáne kóriný shekteýli kezde jyldamdyqty azaıtyp, erekshe saq bolýdy surady.
«Mal qaraýda bolýy kerek. Qorshaý óz ornynda turýy tıis. Al júrgizýshi qaýipke daıyn bolýy shart. Jolda abaısyzdyqtyń baǵasy adam ómiri bolýy múmkin», — dep qosty «QazAvtoJol».