Aqmola oblysynda jol-kólik oqıǵasy bolyp, saldarynan jol tósemine 23 tonna pıaz tógildi. Oqıǵa Jaqsy — Esil — Buzýlyq avtojolynyń temirjol ótkelinde bolǵan. Onda Volvo júk kóligi men lokomotıv soqtyǵysqan, dep habarlaıdy infohub.kz saıty.
Aldyn ala málimetterge sáıkes, júk kóliginiń júrgizýshisi baǵdarshamnyń tyıym salýshy sıgnalyn elemeı, ótkelge shyǵyp, lokomotıvpen soqtyǵysqan. Baqytymyzǵa oraı, apat saldarynan eshkim zardap shekken joq. Alaıda tasymaldanatyn júk — shamamen 23 tonna pıaz — jolǵa tógilip, kólik qozǵalysyna eleýli kedergi keltirgen.
Polısıa qyzmetkerleri oqıǵa ornyna jedel jetip, jol qozǵalysyn rettep, qatysýshylardyń qaýipsizdigin qamtamasyz etken. Olar JKO saldaryn tolyq joıǵanǵa deıin oqıǵa ornynda bolyp, jol tósemine tógilgen pıazdy jınaýǵa kómektesken. Qajetti jumystar júrgizilgennen keıin atalǵan ýchaskede qozǵalys tolyq qalpyna keltirilgen.
JKO faktisi boıynsha tekserý júrgizilip, júk kóliginiń júrgizýshisi jol qozǵalysy erejelerin buzǵany úshin ákimshilik jaýapkershilikke tartylǵan.