Instagram-daǵy chattan alynǵan skrınshot nemese storıs sot isine sebep bolýy múmkin — bul týraly Qazaqstan Respýblıkasynyń Joǵarǵy Soty eskertti. Sottar quqyqbuzýshylardy qorlaıtyn jazbalardy óshirýge, jalǵan málimetterdi teriske shyǵarýǵa jáne ruqsatsyz paıdalanylǵan fotosýretter úshin moraldyq zıannyń ornyn toltyrýǵa mindettep otyr, dep habarlaıdy infohub.kz saıty.
Óskemende turǵyn áıel áleýmettik jeliden ózine qorlaıtyn mazmundy baıqaǵan. Eki qoldanýshy onyń sýretin bylapyt sózdermen birge jarıalaǵan. Jazba avtorlary áıeldiń ádepsiz qylyǵyn ashyq meńzep, «klıenttermen júrgizgen aram pıǵyldy aıla-sharǵylary» týraly da jazǵan.
Sot talqylaýy barysynda jaýapkerler óz áreketterin aqtaýǵa tyrysyp, mátin tek olardyń «jeke pikiri» dep málimdegen. Sot bul ýájderdi qabyldamady. Naqty adamǵa qatysty aıtylǵan emosıalyq aıyptaýlar — derektermen dáleldeýdi talap etetin tujyrymdar dep tanyldy.
Sot buzýshylardy jazbalardy óshirip, teriske shyǵarý mátinin jarıalaýǵa mindettedi. Eki jaýapkerdiń árqaısysynan moraldyq zıannyń ornyn toltyrý retinde 300 myń teńgeden, sondaı-aq sot shyǵyndary óndirildi. Joǵary turǵan ınstansıalar bul sheshimdi kúshinde qaldyrdy.
Uqsas is Jambyl oblysynyń Shý aýdandyq sotynda onlaın formatta qaraldy. Astana turǵyny óz sýretin aýdıtorıasy shamamen 1,5 myń adamnan turatyn eki WhatsApp chatynan tapqan.
Sot usynylǵan hat almasý skrınshottaryn tolyqqandy elektrondyq dáleldeme dep tanydy, al sýrettiń kelisimsiz jarıalanýyn quqyq buzýshylyq dep baǵalady. Talapkerdiń paıdasyna eki kórshisinen 20 myń teńgeden óndirildi. Sonymen qatar sot habarlamalardy óshirý týraly talapty qanaǵattandyrýdan bas tartty, sebebi ýaqyt óte kele olardy taratýǵa qatysqandardyń barlyǵynan óshirýdi tehnıkalyq turǵydan qamtamasyz etý múmkin emes. Úshinshi jaýapkerge qatysty talap onyń qatysy bar ekeni dáleldenbegendikten qabyldanbady. Jambyl oblystyq soty osy sheshimdi qoldady.
«Osylaısha, áleýmettik jelidegi jeke pikir, eger ol adamǵa qatysty derektermen dáleldenbegen naqty aıyptaýlardy qamtysa, jaýapkershilikten bosatpaıdy», — dep atap ótilgen Joǵarǵy Sot materıaldarynda.
QR Azamattyq kodeksiniń 145-babyna sáıkes, eshkim de qandaı da bir adamnyń beınesin onyń tikeleı kelisiminsiz paıdalanýǵa quqyly emes. Bul norma áleýmettik jelilerdegi kez kelgen jarıalanymdarǵa, storısterge jáne toptyq chattardaǵy jappaı taratýlarǵa qatysty. Eger mundaı málimetti taratqan adam olardyń shyndyqqa sáıkes ekenin dáleldeı almasa, azamattar óziniń ar-namysyn, qadir-qasıetin nemese iskerlik bedelin kemsitetin málimetterdi sot arqyly teriske shyǵarýdy talap etýge zańdy quqyly.