Qazaqstan Respýblıkasynyń Joǵary aýdıtorlyq palatasy Qorǵanys mınıstrliginiń qyzmetine memlekettik aýdıt júrgizýdi bastady. Tekserýdiń bastalǵany týraly vedomstvo óziniń Telegram-arnasynda habarlady, dep jazady infohub.kz saıty.
Aýdıt búdjet qarajatynyń tıimdi paıdalanylýyn, sondaı-aq áskerı bólimshelerdi materıaldyq-tehnıkalyq qamtamasyz etý máselelerin qamtıdy.
Eske salaıyq, Mańǵystaý oblysynda áskerı qyzmetshilerdiń qaza tabýynan keıin Qazaqstan Prezıdenti Qasym-Jomart Toqaev Qorǵanys mınıstrligindegi isterdiń jaı-kúıin keshendi tekserý jónindegi komısıa qurý týraly ókimge qol qoıǵan bolatyn.
Sonymen qatar vedomstvo basshylyǵynda kadrlyq ózgerister boldy. Dáýren Qosanov Qazaqstan Respýblıkasynyń Qorǵanys mınıstri qyzmetinen bosatyldy. Onyń ornyna Aıdos Myrzahmetov taǵaıyndaldy.
Qaıǵyly oqıǵa 24 qyrkúıekte oqý-jaýyngerlik tapsyrmany oryndaý barysynda boldy: aýa raıynyń kenetten nasharlaýy men ekpindi jeldiń saldarynan Kaspı teńizine 17 áskerı qyzmetshi aǵyp ketti, olardyń 14-i qaza tapty.
Úsheýi qutqaryldy, bireýi aýrýhanaǵa jatqyzyldy. Kúni buryn oblystyq densaýlyq saqtaý basqarmasy pasıent Mańǵystaý oblystyq kópbeıindi aýrýhanasyna jetkizilgenin habarlaǵan. Áskerı qyzmetshiniń jaǵdaıy turaqty aýyr dep baǵalanǵan.
Aman qalǵandardyń arasynda Atyraý oblysynan 19 jastaǵy Beket Qýandyq jáne Batys Qazaqstan oblysynan Nıkıta Ýdalov bar.