Qyrǵyzstannyń Jogorký Kenesh tóraǵasy Marlen Mamatalıev sheteldik týrıserge parlamentke turaqty tanysý saparlaryn uıymdastyrý máselesin pysyqtaýdy tapsyrdy, dep habarlaıdy infohub.kz saıty.
Jogorký Keneshtiń baspasóz qyzmetiniń málimetinshe, sońǵy jyldary shetel azamattarynyń qyrǵyz parlamentiniń qyzmetine qyzyǵýshylyǵy artyp, Jogorký Keneshtiń jumysymen tanysýǵa degen ótinishter kóbeıip keledi.
«Ekskýrsıalyq baǵdarlama aıasynda týrıserge murajaı men májilis zaldaryn aralaý múmkindigi beriledi. Mundaı saparlar belgilengen tártippen aptasyna bir ret ótkiziledi dep josparlanyp otyr. Ekskýrsıalyq saparlardy uıymdastyrý Jogorký Keneshtiń ashyqtyǵyn arttyrýǵa yqpal etip, sheteldik qonaqtarǵa Qyrǵyz Respýblıkasynyń negizgi memlekettik bılik organdarynyń biri retinde parlament qyzmeti týraly tolyq túsinik alýǵa múmkindik beredi», — delingen baspasóz qyzmetiniń málimdemesinde.
Sondaı-aq Jogorký Keneshte kelýshiler parlamenttiń kádesyı ónimderin satyp ala alatyn arnaıy kádesyı buryshy ashylǵany habarlandy.
Mamatalıev Jogorký Kenesh ǵımaratynyń erekshe mártebesi men strategıalyq mańyzy bar ekenin atap ótip, saparlardy uıymdastyrý kezinde belgilengen qaýipsizdik erejeleri men parlament aýmaǵynda bolý tártibin qatań saqtaý qajettigin aıtty.
«Aıta ketý kerek, Qyrǵyz Respýblıkasynyń azamattary úshin Jogorký Keneshtiń esigi belgilengen talaptar men kelý tártibi saqtalǵan jaǵdaıda barlyq bes jumys kúni ashyq», — dep eske saldy baspasóz qyzmeti.