Sońǵy málimetter boıynsha, Qazaqstanda 444,6 myń jumyssyz azamat tirkelgen. Bul rette úı sharýasyndaǵy áıelder men stýdentterdi qosqanda 4,8 mln adam esepke kirmegen. Tolyq aqparatty infohub.kz saıty habarlaıdy.
Ulttyq statısıka búrosynyń dereginshe, 2026 jyldyń ekinshi toqsanynda respýblıkada 444,6 myń jumyssyz bolǵan. Jumyssyzdyqtyń jalpy deńgeıi 4,5 paıyzdy qurady – bul aldyńǵy toqsanmen birdeı.
Eske salaıyq, Qazaqstanda jumyssyzdyq Halyqaralyq eńbek uıymynyń (HEU) ádistemesi boıynsha anyqtalady. Ol 15 jastan asqan, tabys ákeletin jumysy joq, belsendi túrde jumys izdep, jaqyn arada jumysqa kirisýge daıyn adamdardyń jumys kúshi quramyndaǵy úlesi retinde esepteledi.
El boıynsha jumys kúshine kiretinderdiń sany 9,8 mln adamnan asady. Onyń ishinde 7,3 mln-ǵa jýyǵy jaldamaly jumysshylar, al 2,1 mln-nan astamy jeke kásipkerler, ózin-ózi jumyspen qamtyǵandar jáne eńbek shartynsyz jumys isteıtinder.
Sonymen qatar, 15 jastan asqan 4,8 mln adam jumyssyzdyq statısıkasyna enbegen. Bul topqa zeınetkerler, stýdentter, úı sharýasyndaǵy áıelder jáne basqa da sanattaǵy turǵyndar kiredi.
Qazaqstandaǵy eń joǵary jumyssyzdyq deńgeıi Mańǵystaý oblysynda tirkelgen – 5 paıyz. Odan keıin Atyraý, Jambyl jáne Pavlodar oblystary – árqaısysynda 4,8 paıyz.
Astanada jumyssyzdyq deńgeıi 2026 jyldyń ekinshi toqsanynda 4,2 paıyzdy, Almatyda – 4,4 paıyzdy, al Shymkentte – 4,6 paıyzdy qurady. Eń tómengi kórsetkish Qaraǵandy oblysy men Ulytaý oblysynda – 4 paıyzdan.
Eske salaıyq, Qazaqstanda jumysynan aıyrylǵan azamattar áleýmettik tólemder ala alady. Ótemaqy alty aı boıy tólenýi múmkin, al ony qalaı rásimdeý kerektigi týraly osy jerden oqýǵa bolady.
Buǵan deıin Aýyl sharýashylyǵy mınıstrligi erekshe mańyzdy, shuǵyl jáne kúrdeli jumystardy atqaratyn qazaqstandyqtarǵa ústemeaqy mólsherin ulǵaıtýdy josparlap otyrǵany habarlanǵan bolatyn.