Ómirdiń asqynǵan qarqyny men kúndelikti stresster bizdi óz aǵzamyzdyń sıgnaldaryn elemeýge jıi májbúrleıdi. Minez-qulyqtaǵy qandaı ózgerister alańdatýy kerek ekenin medısına ǵylymdarynyń doktory, MD, PhD Newcastle University, Almatydaǵy Med space klınıkasynyń nevropatolog-ıglorefleksoterapevti Álıa Saǵyndyqova aıtyp berdi, dep habarlaıdy infohub.kz saıty.
Dárigerdiń aıtýynsha, kópshilik densaýlyqtyń nasharlaýyn kádimgi sharshaýmen baılanystyryp, aǵzanyń múmkindik sheginde jumys isteı bastaǵanyn baıqamaı qalady. Al ózińdi tyńdap, mamandarǵa ýaqytynda júginý óte mańyzdy.
Birinshi belgi — adamnyń ashýshań jáne shydamsyz bolýy. Ony jarqyn jaryq, qatty dybys, adam kóptigi, joldaǵy keptelis jáne basqa da nárseler titirkendiredi.
Ekinshi belgi — zeıinniń shashyrańqylyǵy men umytshaqtyqtyń paıda bolýy. Mundaı kúıde adam esiktiń kiltin shyǵarýdy umytyp, jaryqty óshirmeı qoıýy nemese basqa da osyǵan uqsas qatelikter jiberýi múmkin.
Úshinshi belgi — qatty sharshaý. Adam únemi sharshaǵandy sezinedi: oıandy, turdy — áldeqashan sharshap tur. Qarapaıym isti oryndaý úshin de erik-jigerdi jumyldyrý qajet, bul óte qıynǵa soǵady.
Dáriger bul belgilerdi baıqasańyz, olardy elemeýge bolmaıtynyn atap ótti, sebebi bul júıke júıesiniń tozýǵa jumys istep jatqanynyń alǵashqy «qońyraýlary». Jaǵdaıdyń ýshyǵyp, aýyr nevrologıalyq aýrýǵa ulasýyna jol bermeńiz. Mundaı belgiler paıda bolǵan kezde dereý nevropatologqa qaralý kerek.