Zımbabvedegi Karıba kólinde apta basynda bolǵan qaıǵyly oqıǵada qaza tapqandar sany 68-ge jetti. Qutqarýshylar taǵy 22 máıitti sýdan alyp shyqqan. Qaza tapqandardyń 18-i — balalar, dep habarlaıdy infohub.kz saıty.
Seısenbi kúni qatty tolqynnan aman qalmaǵan eski keme Karıba qalasynan eldiń soltústik-batysyndaǵy aýyldyq jáne balyqshylyq qaýymdastyqtarǵa bet alǵan edi. Bul aımaqta joldar qıraǵan, qoǵamdyq kólik tapshy. Bılik kemede qansha adam bolǵanyn nemese qansha adamnyń habarsyz ketkenin áli aıtqan joq.
Aldyn ala boljam boıynsha, jolaýshylar sany 153-ke jetýi múmkin, al kemeniń syıymdylyǵy nebári 90 adam. Zımbabveniń tótenshe jaǵdaılar jónindegi agenttigi 77 adam qutqarylǵanyn habarlady.
Bastapqyda bılik balalar sany belgisiz ekenin, sebebi bılet jasyna tolmaǵandar jolaýshylar tizimine enbegenin málimdegen. Keıin jarıalanǵan polısıa tizimine sáıkes, qaza tapqan balalardyń 16-sy 10 jasqa deıingiler, eń kishisi nebári 1 jasta.
Karıba — álemdegi kólemi boıynsha eń úlken jasandy kól. Ol 1950-shi jyldardyń aıaǵy men 1960-shi jyldardyń basynda Zambezı ózenin bógeý arqyly paıda bolǵan. Kóldiń uzyndyǵy 200 shaqyrymnan asady, keı jerlerde eni 40 shaqyrymǵa jetedi. Karıba kólin Zımbabve men Zambıa bólisedi, olardyń shekarasy kóldiń ortasymen ótedi.