Zımbabvede shirkeý múshelerin tasymaldaǵan marshrýttyq taksı men júk kóliginiń soqtyǵysýynan 27 adam qaza tapty. Bul týraly polısıa ókili habarlady, dep málimdeıdi infohub.kz.
Polısıa ókili Pol Nátıdiń aıtýynsha, juma kúni túnde astana Harareden 132 shaqyrym (82 mıl) ońtústikke qaraı ornalasqan Chıvhý qalasynyń mańyndaǵy iri tas jolda aq kıimdi jergilikti afrıkalyq hrıstıan dinı uıymynyń múshelerin konferensıaǵa aparǵan marshrýttyq taksı basqa kólikti basyp ozýǵa tyrysqan júk kóligimen betpe-bet soqtyǵysqan.
Memlekettik teleradıokompanıa ZBC provınsıalyq úkimet mınıstrine silteme jasap, 23 adam oqıǵa ornynda qaza tapqanyn, al qalǵandary jergilikti aýrýhanaǵa jetkizilgennen keıin jaraqattarynan kóz jumǵanyn habarlady. Jergilikti BAQ marshrýttyq taksıdiń jalynǵa oranyp, kúıip ketkenin kórsetetin sýretterdi jarıalady.
Nátı eki kólikte de belgisiz sany jolaýshy bolǵanyn aıtty. Zımbabvede adam tolǵan avtobýstar men marshrýttyq taksıler qatysqan jol apattary jıi kezdesedi jáne olar kóbinese qaýipti júrgizý men joldyń nashar jaǵdaıyna baılanysty bolady.
Zımbabve — jol qaýipsizdigi eń nashar elderdiń biri, bıliktiń málimetinshe, apattardyń 94% adam faktorynan bolady. BUU Afrıka ekonomıkalyq komısıasynyń dereginshe, Afrıkada jyl saıyn jol apattarynan shamamen 300 myń adam qaza tabady, bul álemdik kórsetkishtiń tórtten birin quraıdy, al qurlyqta álemdegi kólikterdiń nebári 3% ǵana bar.