Zımbabvedegi Karıba kólinde seısenbide artyq júk tıelgen parom aýdarylyp, kem degende 15 adam qaza taýyp, 27 adam habarsyz ketti. Bul týraly eldiń tótenshe jaǵdaılar jónindegi ulttyq basqarmasy habarlady. Vedomstvonyń málimetinshe, 77 adam qutqarylyp, kóldegi bir aralǵa jetkizilgen.
Zımbabveniń azamattyq qorǵanys qyzmeti satylǵan bıletter boıynsha paromda 114 eresek jolaýshy men 5 ekıpaj múshesi bolǵanyn rastaı alatynyn, alaıda bılet talap etilmeıtin jastaǵy balalardyń naqty sany belgisiz ekenin aıtty. Paromnyń syıymdylyǵy 90 adamǵa arnalǵan.
Jergilikti parlament depýtaty Mýsa Mýrombedzı óziniń áleýmettik jelidegi paraqshasynda jaǵadaǵy adamdardyń eskirgen paromdy jolǵa shyǵaryp salyp jatqanyn kórsetetin vıdeo jarıalady. Onyń aıtýynsha, aýyl turǵyndary bul paromdy kól boıymen Karıba qalasyna barý úshin paıdalanady. Vıdeoda jaǵadaǵy keıbir adamdar paromnyń kóldegi qatty tolqyndarǵa tótep bere alatynyna alańdaýshylyq bildirgen.
Buǵan deıin Zımbabve polısıasy qutqarý operasıasy júrip jatqanyn habarlaǵan, biraq eshqandaı qosymsha málimet bermegen. Zımbabveniń memlekettik telearnasy ZBC tikushaq aınalyp júrgen kezde jyldam júzetin katerlerdiń kóldegi aýdarylǵan qaıyqqa qaraı bet alǵanyn kórsetetin vıdeo jarıalady.
Ońtústik Afrıkadaǵy Karıba kóli Zımbabve men kórshiles Zambıa arasyndaǵy shekaranyń bir bóligin quraıdy. Bul álemdegi kólemi boıynsha eń úlken jasandy kól. Ol 1950 jyldardyń sońy men 1960 jyldardyń basynda Zambezı ózenine bóget salý arqyly paıda bolǵan. Nátıjesinde ańǵar birtindep sýǵa tolyp, qazirgi kezde uzyndyǵy 200 shaqyrymnan asatyn, keı jerlerinde eni 40 shaqyrymǵa jetetin úlken kólge aınalǵan. Zımbabve men Zambıa bul kóldi ortaq paıdalanady, resmı shekara kóldiń ortasymen ótedi.