InfoHub Logo

Қызылорда облысында 14 жыл бұрын болған жасөспірімнің өліміне қатысты қылмыс ісі жаңа куәгердің пайда болуымен қайта ашылды. Бұл туралы Ішкі істер министрлігі хабарлады.

Бұл туралы Infohub.kz ақпарат агенттігі хабарлайды.

Оқиға 2012 жылы Қармақшы ауданының Жосалы кентінде жасөспірімдер арасында болған жаппай төбелес кезінде орын алған. Төбелес барысында бір оқушы пышақ жарақатын алған. Ол ауруханаға жеткізілгенімен, есін жимастан көз жұмды.

Іс неге ұзақ уақыт бойы ашылмай келді?

Ішкі істер министрлігінің Криминалдық полиция департаменті бастығының орынбасары Руслан Назаровтың айтуынша, оқиға болғаннан кейін полиция жанжалға қатысушыларды анықтаған. Алайда, жеткілікті дәлел мен куәгерлердің жоқтығынан іс ұзақ жылдар бойы ашылмай келді.

Биыл жағдай өзгеріп, жедел-тергеу тобы маңызды куәні тауып, оқиғаның толық мән-жайын анықтады. Тергеу барысында күдікті ретінде сол төбелеске қатысқан, бұған дейін басқа ауыр қылмыс жасағаны үшін жазасын өтеген азамат анықталды.

Күдікті қамауға алынды

Күдікті қазір Қызылордадағы тергеу изоляторына тоғытылып, тиісті тергеу әрекеттері жүргізілуде. Жинақталған дәлелдемелерді ұсынғаннан кейін ер адам кінәсін мойындаған.

Тергеу анықтағандай, қылмысқа жастар арасындағы жанжал және жеке өшпенділік себеп болған. Қазіргі уақытта күдікті қамауда отыр, қылмыстық іс сотқа жолданды.

ІІМ өткен жылдардағы қылмыстарды тергеу жалғасатынын және кінәлілердің «ерте ме, кеш пе заң алдында жауап беретінін» атап өтті.