InfoHub Logo

Қаржылық мониторинг агенттігі (ҚМА) бұрынғы «ҚазТемірТранс» АҚ вице-президенті Азамат Капеновке қатысты қозғалған қылмыстық іс бойынша жаңа мәліметтерді жариялады. Ол 2024 жылдың тамыз айынан бері іздеуде.

Бұл туралы Infohub.kz ақпарат агенттігі хабарлайды.

Миллиардтаған шығын

Тергеу мәліметтері бойынша, Капенов қызмет бабын пайдаланып, өзіне қарасты компанияларға жүк вагондарын пайдалану қызметін көрсету кезінде заңсыз артықшылықтар берген. Салдарынан «ҚазТемірТранс» АҚ-на 5,2 миллиард теңгеден астам залал келтірілген.

«Қазіргі уақытта Капенов А.А. халықаралық іздеуге жарияланды. Сот оны қамауға алу туралы сырттай санкция берді. Келтірілген залалды өтеу және заңсыз иемделген активтерді қайтару мақсатында Бас көлік прокуратурасы «Достық» станциясындағы терминалды сотқа дейін тәркілеу туралы өтінішхат жолдады», - деп хабарлады ҚМА.

Астана қалалық қылмыстық істер жөніндегі мамандандырылған ауданаралық сотының қаулысымен аталған мүлік мемлекет кірісіне айналдырылды. Тергеу жалғасуда.

ҚМА-ның атап өтуінше, мүлікті тәркілеу Қазақстанның көлік-логистикалық әлеуетін дамыту тұжырымдамасын іске асыруға ықпал етеді.

Азамат Капенов туралы не белгілі

Азамат Капенов 1978 жылы 12 сәуірде туған, Ресей азаматы. БАҚ-та оны Қарім Мәсімовтің бұрынғы күйеу баласы ретінде атап өтеді.

2024 жылдың тамыз айында Сыбайлас жемқорлыққа қарсы қызмет (қазіргі ҰҚК Сыбайлас жемқорлыққа қарсы қызметі) Капенов туралы ақпарат бергені үшін сыйақы жариялаған болатын. Ол кезде оның алаяқтық жасады деген күдікпен іздеуде екені хабарланған.