InfoHub Logo

Алматы қаласының тұрғыны әлеуметтік желіде терренкурде өсімдіктерді өңдеуден кейін жұрттың жөтелі мен тамағының қышуына шағымданды. Бұл жағдайға қатысты қала әкімдігі түсініктеме берді.

Бұл туралы Infohub.kz ақпарат агенттігі хабарлайды.

Оқиғаның мән-жайы

Жазба авторының айтуынша, терренкурде кешкі серуен кезінде өзі және жұбайы көптеген адамдардың жөтеліп жатқанын байқаған.

«Басында қарсы беттен жөтеліп бара жатқан адамдар кездесті. Ойладым, кездейсоқ шығар деп. Кейін ауа үрлегіштің жұмысына ұқсас дыбысты естідім. Одан әрі мейрамхана террасасында қара қорғаныш костюм мен газтұмылдырық киген ер адамның химиялық зат бүркіп жатқанын көрдім. Айнала аэрозоль бұлты болды», - деп жазды алматылық.

Ол адамдардың беттерін жауып, бұл жерден тезірек өтуге тырысқанын айтты.

«Мұны көріп, біз де жүгірдік. Бірақ көмектеспеді. Үйге дейін жөтеліп келдік, сосын тамағымызды шайғанша жөтелдік. Егер өңдеу үшін костюм мен газтұмылдырық киген адам қажет болса, неге жай серуендеп жүрген адамдар бұған шыдауы керек?» - деп сұрақ қойды жазба авторы.

Алматы қаласы әкімдігінің жауабы

Қала әкімдігінің мәліметінше, аталған учаскеде мердігер ұйым жапырақты жейтін және соратын зиянкестерден жасыл желектерді жоспарлы түрде өңдеген.

Олардың айтуынша, жұмыстар кезінде Қазақстан аумағында қолдануға рұқсат етілген сертификатталған биологиялық және кейбір жағдайларда химиялық препараттар қолданылады.

Әкімдік қолданылатын құралдардың адам денсаулығына, үй жануарларына, құстарға, балықтарға және басқа да тірі ағзаларға қауіп төндірмейтінін атап өтті. Сонымен қатар, қолданылатын препараттардың жағымсыз иісі болуы мүмкін, бұл уақытша қолайсыздық тудыруы, соның ішінде тамақ қышуы немесе жөтел сияқты белгілерге әкелуі ықтимал.

Әкімдік өңдеу жұмыстарының тиімділігін арттыру үшін түнде жүргізілетінін де түсіндірді.

«Бұл тікелей күн сәулесінің әсерін болдырмауға және өңдеудің максималды нәтижелілігін қамтамасыз етуге мүмкіндік береді», - деп толықтырды әкімдік.

Баспасөз қызметі қызметкердің қауіпсіздік талаптарына сәйкес қорғаныш костюмі мен газтұмылдырық кигенін атап өтті. Мұндай жабдық кез келген өңдеу құралдарымен жұмыс істеу кезінде міндетті болып табылады.