InfoHub Logo

Америкалық миллионер, 75 жастағы кәсіпкер Эрни Дозио Габонда аң аулау сафари кезінде қаза тапты. Ол сирек кездесетін орман антилопасы мен карлик буйволды атып алмақ болған. Алайда, жоспарланған аңшылық трагедиямен аяқталды.

Бұл туралы Infohub.kz ақпарат агенттігі хабарлайды.

Қапыда шабуылдаған пілдер

Оқиға Лопе-Оканда тропикалық орманды алқабында болған. Миллионермен бірге кәсіпқой аңшы-жолсерік те болған. Кенеттен қалың бұтаның ішінен бес аналық піл мен олардың төлі шыға келген. Өздерінің кішкентайын қорғауға ұмтылған пілдер топқа бірден шабуылдаған.

Аңшы жараланды, миллионер қаза тапты

Басылымның хабарлауынша, кәсіпқой аңшы пілдердің соққысынан лақтырылып, ауыр жарақат алған. Ал Эрни Дозионың қолында тек антилопа аулауға арналған мылтығы ғана қалған. Өкінішке орай, ол пілдердің аяқастында қалып, сол жерде жан тапсырды.

«Сафари заңды болды»

Қайтыс болған азаматтың танысының айтуынша, Эрни Дозио жастайынан аңшылықпен айналысқан. Оның Африка мен АҚШ-та көптеген аңшылық трофейлері болған. «Көпшілік ірі аңдарға аңшылықты құптамайды, бірақ оның барлық сафарилері заңды лицензиямен өткізіліп, жануарлар санын реттеу аясында жүргізілді», - дейді танысы.

Марқұмның мәйіті АҚШ-тың Габондағы елшілігінің көмегімен Калифорнияға жеткізіледі.

Кәсіпкерлік қызметі

Эрни Дозио – Pacific AgriLands компаниясының иесі. Бұл компания Калифорнияда 12 мың акр жүзімдікке иелік етеді. Сондай-ақ, басқа жүзімдіктерді басқарумен және өнім жинауға арналған жабдықтармен қамтамасыз етумен айналысады.