InfoHub Logo

Ақтауда 24 жастағы медициналық колледж түлегі Маржан Сұлтанғалиеваның өліміне қатысты қылмыстық іс бойынша тергеу қайта жандандырылды. Бұл туралы Lada.kz сайтына сілтеме жасап Tengrinews.kz хабарлады.

Қала прокуратурасы қыздың өліміне байланысты Ақтау қалалық полиция басқармасы тергеушісінің қылмыстық істі тоқтату туралы қаулысын күшін жойып, тергеуге бірқатар тапсырма берді. Бұл туралы жәбірленуші тараптың өкілі, Маңғыстау облыстық заңгерлер палатасының мүшесі Ажар Қартбай мәлімдеді.

Еске сала кетейік, Маржан Сұлтанғалиеваның денесі 1 қаңтарда Ақтаудағы пәтерлердің бірінен табылған болатын. Полиция бұл жағдайды суицид деп мәлімдеген еді. Алайда, марқұмның туыстары оның өз еркімен өмірден кетуі мүмкін еместігіне сенеді. Қыздың анасы тергеудің, соның ішінде медициналық сараптамалардың уақытылы жүргізілмегенін және көптеген сұрақтарға нақты жауап берілмей тұрып, істі асығыс жауып тастағанын айтқан.