InfoHub Logo

Ақтау қаласының 3-ші шағын ауданындағы ескі барақ үйлердің дәуірі аяқталуда. Бұрын қала тұрғындарына баспана болған бұл үйлер енді жаппай жаңғыртудан өтіп, заманауи көпқабатты тұрғын үйлерге жол ашуда. Бұл ауқымды жоба қаланың ең көне тұрғын алқаптарының бірінің келбетін түбегейлі өзгертуге бағытталған.

Бұл туралы Infohub.kz ақпарат агенттігі хабарлайды.

Ауданның жаңаруы

Бұрын 3-ші шағын ауданның көп бөлігі барақ типтес үйлерден тұратын. Алайда, қазіргі таңда бұл үйлердің саны азайып, олардың орнына жаңа заманауи тұрғын үйлер бой көтеруде. 2028 жылға дейін жалғасатын жаңғырту бағдарламасы аясында бұл ауданның келбеті толықтай өзгереді деп күтілуде.

Құрылыс және көшіру жұмыстары

Қазіргі таңда ескі, қираған үйлердің орнына жаңа тұрғын үйлер салынып, тұрғындар жаңа баспаналарға қоныстандырылуда. Ақтау қаласы әкімдігі мен «ҚұрылысСтройСервис» ЖШС арасындағы келісімшарт негізінде жүзеге асырылып жатқан бұл бағдарлама бойынша, 2023 жылы 3-ші шағын ауданда №71 (30 пәтер) және №72 (35 пәтер) бес қабатты тұрғын үйлер пайдалануға берілді. Бұл үйлерге №34, 35, 36, 37 және 38-ші ескі үйлердің тұрғындары көшірілді. Оларға 52 пәтер және 1 коммерциялық нысан тиесілі болды.

2025 жылы №37 бес қабатты, 90 пәтерлік тұрғын үй салынды. Бұл үйге №33 ескі үйдің 16 пәтері мен 1 коммерциялық нысанының тұрғындары қоныстанды. Сондай-ақ, сол жылы №35 бес қабатты, 100 пәтерлік тұрғын үйдің құрылысы аяқталып, №39, 40, 42 және 43-ші ескі үйлердің 49 пәтерінің тұрғындары жаңа баспанаға ие болды.

Болашақта ескі №39, 40, 42 және 43-ші үйлердің орнына жаңа тұрғын үй кешендері салынатын болады.