InfoHub Logo

Астанада LRT желісіндегі «Жібек жолы» станциясы жолаушыларға есігін ашты. Бұған дейін аталған станцияға жетудің жолы болмағандықтан, ол жабық тұрған еді. Енді жолдар салынып, станция алғашқы жолаушыларын қабылдай бастады.

Бұл туралы Infohub.kz ақпарат агенттігі хабарлайды.

«Астана- Не? Қайда? Қашан?» Telegram арнасының хабарлауынша, қазіргі уақытта станцияның тек бір кіреберіс-шығаберісі ғана жұмыс істейді. Екінші шығатын есік кейінірек ашылады деп күтілуде.

Айналасындағы тыныс

Станция маңында әзірге бір жаңа тұрғын үй және бірнеше жеке үйлер бар. Болашақта бұл аумақтағы жеке секторды алып, оның орнына жаңа тұрғын үй кешендері салынуы мүмкін.

Станция ішінде әзірге тыныш, жолаушылар да көп емес. Алайда, аудан игеріліп, құрылыс жұмыстары қарқын алғанда, станцияның да өмірі өзгеретіні сөзсіз.

Болашақ жоспарлар

Бұдан бөлек, Қалдаяқов көшесі жағынан станцияның астынан тікелей жол салу жоспарлануда. Бұл болашақ тұрғындар үшін станцияны одан әрі ыңғайлы ете түспек.

Бұған дейін «Курсив» LRT желісінің атауы «Тарлан — Астана» деп өзгеретіні туралы жазған болатын. Бұл туралы қалалық мәслихат отырысында белгілі болды.

Ономастика комиссиясының отырысында LRT-ға мәдени маңызы бар атау беру ұсынылған.

Контекст

Естеріңізге сала кетейік, 16 мамырда Қазақстан президенті Қасым-Жомарт Тоқаев Астана LRT жұмысын ресми түрде бастап берген болатын. Кейіннен, екі апта ішінде аталған көлікпен миллионға жуық жолаушы тасымалданғаны туралы елорда әкімі Жеңіс Қасымбек мәлімдеген еді.