InfoHub Logo

Атырау қаласы соңғы үш күн бойы қалың шаң-тозаңның астында қалды. Қаланың көшелері бозарып, ғимараттардың реңі бұлыңғыр тартты. Көліктер тіпті күндіздің өзінде фараларын жағып жүруге мәжбүр болды. Бұл жағдай қаланың тыныс-тіршілігін біршама тежеп, тұрғындарды алаңдатты.

Бұл туралы Infohub.kz ақпарат агенттігі хабарлайды.

Көшелердегі тығыздық азайды

Қала көшелері әдеттегіден тыс бос қалды. Автомобильдердің ағыны азайды, аялдамалардағы адамдар саны да сиреді. Сыртқа шыққандар беттерін маскамен немесе орамалмен жауып алған. Ауадағы шаңды сезуге болады, ол киімге де жабысып қалады.

Кейбір аудандарда көкжиекті нашар көруге болатындықтан, жүргізушілер жылдамдықты азайтуға мәжбүр болды. Жаяу жүргіншілер көздерін қысып, желден қорғануға тырысты.

Балықшылар әдеттегідей

Тек өзеннің мұзындағы жағдай өзгеріссіз қалды. Балықшылар бұрынғыдай өз орындарында отыр. Оларға аязды жел мен сұр көк аспан да кедергі бола алмады.

Атырау облысы бойынша экология департаментінің мәліметінше, бұл шаңды дауыл Каспий теңізінің суы азайған аумақтарымен байланысты болуы мүмкін. Мониторинг станциялары ластаушы заттардың шекті жол берілетін концентрациясының асып кетуін тіркемеген.

Тұрғындарға мүмкіндігінше көшеде жүруді азайту ұсынылды. Бос қалған көшелерге қарап, көпшілігі бұл ұсынысты орындағанға ұқсайды.

Айгүл МАНСУРОВА

Фото авторы