InfoHub Logo

Танымал театр және кино актері Азамат Сатыбалды өміріндегі ең ауыр сынақтардың бірі туралы ашық айтты. Ол жарының денсаулығына байланысты бала көтере алмайтыны туралы диагноз қойылғандағы қиындықтарды бөлісті.

Бұл туралы Infohub.kz ақпарат агенттігі хабарлайды.

Отбасылық қиындықтар

Актердің айтуынша, олар отбасында бір ғана ұл тәрбиелеп отыр. Алайда, кейбір адамдардың «Туып алмайсыңдар ма? Не істеп жүрсіңдер бір баланың бетіне қарап?» деген сөздері жанға бататын болған. Азамат Сатыбалды бұл сөздердің артындағы жағдайды ешкім білмейтінін айтты.

Ол жұбайы Назгүл екеуінің де көпбалалы отбасынан шыққанын, өздері де көп балалы болуды армандағанын жеткізді. Алайда, тұңғыш ұлдары дүниеге келгеннен кейін жары сырқаттанып, дәрігерлер оған бала көтере алмайтынын айтқан.

Дәрігерлердің диагнозы және әкенің даналығы

«Біздің бармаған жеріміз жоқ. Бірақ нәтиже болмады. Бірден “бала көтермейді” деген диагноз қойылды. Жігіт болған соң жаман ойлар да келеді екен», – дейді актер.

Актердің айтуынша, сол кезде әкесінің бір ауыз сөзі оны үлкен қателік жасаудан сақтап қалған. Әкесі: «Егер Назгүлден басқа әйел аламын десең, болмаса ажырасып тоқал аламын десең, екі дүниеде батамды бермеймін. Маған Назгүлден артық келін керек емес. Алла Тағала 1 балаға татымайтын 10 бала бере ме, 10 балаға татитын 1 бала бере ме – өзі біледі. Бар балаңа шүкір ет» деп айтқан екен.

Өмірлік сабақ

Әкесінің сөздерінен кейін Азамат Сатыбалдының көзқарасы өзгеріп, отбасындағы қарым-қатынас нығая түскен. «Қазір ұлым 21 жаста. Ешқашан өкінбеймін. Әкемнің даналығына ризамын», – деді актер.