InfoHub Logo

Ақтаулық асаба Хан әлеуметтік желіде тараған интимді видеоға байланысты туындаған жағдайдан кейін алғаш рет жұртшылық алдына шығып, отбасына, әсіресе жұбайына жасалып жатқан қысымға қатысты үн қатты.

Бұл туралы Infohub.kz ақпарат агенттігі хабарлайды.

Асаба ең алдымен көпшіліктен әйеліне бағытталған жағымсыз пікірлер мен қысымды тоқтатуды өтінді. Оның айтуынша, бұл жағдай жұбайына ауыр тиген.

"Қазір әйеліме өте қиын. Егер сын айтқыларыңыз келсе, маған айтыңыздар. Мен көтеремін. Өтінемін, оған тиіспеңіздер. Ол ештеңеге кінәлі емес", – деді ол.

Отбасындағы жағдай және жалған ақпараттар

Асаба анасының келініне деген көзқарасы өзгермегенін және отбасында түсіністік барын жеткізді. Желіде асабаның 16 жастағы мобилографтың отбасынан 8 миллион теңге талап етті деген ақпарат тараған болатын. Алайда, ол бұл мәліметті жоққа шығарды.

"Мен ешқандай ақша сұраған жоқпын. Барлығы сот арқылы шешіледі. Әйелімнің абыройы бәрінен қымбат. Мұндай мәселеде ақша ештеңені шешпейді", – деді асаба.

Ол сондай-ақ әлеуметтік желіде тараған жалған ақпараттарға сенбеуге шақырды.

Еңбек жолы және болашақ жоспарлары

Асаба өзіне бағытталған сындарға да жауап беріп, жетістікке өз еңбегімен жеткенін айтты. Оның сөзінше, ол бала кезінен еңбекке араласқан.

"Мен бәріне өзім жеттім. Ауылда түрлі жұмыс істедім. Бүгінде Instagram арқылы табыс тауып, отбасымды асырап отырмын", – деді ол.

Желі қолданушылары оның қала ауыстыру жоспарына да қызығушылық танытқан. Асаба бұл сұраққа нақты жауап бермей, алдымен қазіргі жағдайдың шешілуі маңызды екенін жеткізді.

"Бәрі мүмкін. Бірақ алдымен осы мәселені соңына дейін жеткізу керек", – деді ол.