InfoHub Logo

Қазақстан Президенті Қасым-Жомарт Тоқаев Астана қаласындағы Astana LRT жеңіл рельсті көлік жүйесінің (LRT) ресми іске қосылуын жасады. Мемлекет басшысы алғашқы жолаушы ретінде «Әуежай» станциясынан «Ұлттық музей» станциясына дейін LRT-мен жүріп өтті.

Бұл туралы Infohub.kz ақпарат агенттігі хабарлайды.

Қаланың көлік жүйесіне жаңа серпін

LRT жүйесінің іске қосылуымен бірге, елордада қоғамдық көлікті басқару және бақылауды қамтамасыз ететін Бірыңғай диспетчерлік орталығы жұмысын бастады. Астана әкімі Жеңіс Қасымбектің айтуынша, бұл орталықта 21 маман жұмыс істейді.

Әрбір LRT пойыз құрамы 600-ден астам жолаушыны тасымалдауға арналған. 22,4 шақырымдық бағытта 15 пойыз (4-уі резервте) пилотсыз режимде қатынайды. Басқару, үдету, тежеу және есіктерді ашу процестері толығымен автоматтандырылған. Төтенше жағдайлар кезінде басқару және диспетчермен байланыс орнату мүмкіндігі сақталған.

Жобаның маңыздылығы және болашағы

Инфрақұрылым 18 станция мен заманауи депоны қамтиды. Барлық маршрут бойынша жол жүру уақыты шамамен 40 минутты құрайды, ал орташа жылдамдық сағатына 50-60 шақырым болады. Қозғалыс аралығы 5-6 минутты құрайды.

Мемлекет басшысы бұл оқиғаның Астана және бүкіл Қазақстан үшін маңызды екенін атап өтті. Қасым-Жомарт Тоқаев болашақта елорда Еуразияның көлік торабына айналуы тиіс екенін баса айтты.

Президент LRT құрылысын жүзеге асырған қытайлық компания өкілдеріне, CTS Transportation және Astana LRT қызметкерлеріне сәттілік тіледі. «Бұл тек бірінші қадам!» — деп атап өтті Президент.

LRT жобасының екінші кезеңін іске асыру жоспарлануда. Жаңа бағыттар бойынша, соның ішінде «Астана-1» вокзалы, «Жағалау» тұрғын алабы және Қосшы қаласы бағыттарына жаңа желілер салынады. Екінші кезеңнің жалпы ұзындығы 26,5 шақырым болып, 20 станцияны қамтиды.