InfoHub Logo

Мәнерлеп сырғанаудан Олимпиада чемпионы атанған Михаил Шайдоровтың бапкері ауысады деген қауесеттерге Қазақстанның туризм және спорт министрі Ербол Мырзабосынов жауап берді.

Бұл туралы Infohub.kz ақпарат агенттігі хабарлайды.

Бапкер тағдыры – спортшының өз қолында

Министрдің айтуынша, бапкерлік штабқа қатысты шешімді спортшының командасы өздері қабылдайды. «Бапкер мәселесі бойынша менде ақпарат жоқ. Бізде Олимпиада чемпионы бар, ол өз мақсатына жетті. Ал бапкерді таңдау – команданың өз еркінде», – деді Мырзабосынов.

Ол Алексей Урмановтың спортшы ретінде, Олимпиада чемпионы ретінде және жоғары деңгейдегі шәкірт тәрбиелеген ұстаз ретінде ерекше тәжірибесі бар екенін атап өтті. «Өзі Олимпиада чемпионы болған адам, шәкіртінің Олимпиада тұғырынан көрінгенде қандай сезім болатынын біледі», – деп қосты министр.

Шайдоровтың жеңісі және оған деген құрмет

Айта кетейік, Астанадағы салтанатты қарсы алу рәсімінде бапкер Алексей Урманов олимпиадалық чемпион Михаил Шайдоровпен бірге сахнаға шықпаған еді. Бұл жағдай көпшіліктің назарын аударды.

Қазақстандық мәнерлеп сырғанаушы Михаил Шайдоров 2026 жылғы қысқы Олимпиада ойындарында ерлер арасындағы жарыста алтын жүлдегер атанды. Ол 21 жасында Олимпиада чемпионы атанып, ел мерейін асырды. Қасым-Жомарт Тоқаев та Михаил Шайдоровты құттықтап, оны «Барыс» орденімен марапаттау туралы шешім қабылдады.

Олимпиада чемпионы 24 ақпаннан 25 ақпанға қараған түні елордаға оралды. Салтанатты шара аясында Шайдоровқа үш бөлмелі пәтердің сертификаты табысталды.