InfoHub Logo

Наурыз айында Қазақстан ауа райының қандай болатыны белгілі болды. «Қазгидромет» РМК мамандары алдын ала синоптикалық болжамды ұсынды. Оған сәйкес, алдағы айда еліміздің басым бөлігінде ауа температурасы нормадан жоғары, ал жауын-шашын мөлшері нормадан артық болады деп күтілуде.

Бұл туралы Infohub.kz ақпарат агенттігі хабарлайды.

Ай ішінде ауа райы тұрақсыз болады

Мамандардың айтуынша, наурыз айында ауа райының тұрақсыз сипаты байқалады. Еліміздің солтүстік жартысында негізінен қар, ал батыс және оңтүстік өңірлерде жаңбыр мен қар аралас жауын-шашын болады. Кей күндері жел күшейіп, боран соғып, тұман түсіп, көктайғақ құбылыстары да орын алуы мүмкін.

Солтүстік пен шығыста қыс жалғасады

Еліміздің солтүстік, шығыс және орталық аймақтарында наурыз айы қыстың жалғасы ретінде сезіледі. Бұл өңірлерде суық ауа райы, қар, боран, тұман мен көктайғақ жиілеп, қысқы сипат сақталады. Дегенмен, айдың бірінші онкүндігінде температура біртіндеп көтеріліп, түнде -28-38 градустан -5-10 градусқа дейін, күндіз -10-20 градустан 0-8 градусқа дейін жылынады. Онкүндіктің соңында температура қайта төмендеуі ықтимал.

Батыс пен оңтүстікте көктем ерте сезіледі

Батыс өңірлерде наурыз айы да ауыспалы сипат алып, суыту мен жылыту кезеңдері алмасып отырады. Бірінші онкүндікте түнде ауа температурасы -5-15-тен 0-5 градусқа дейін, күндіз 0-8-ден -3+7 градусқа дейін өзгереді. Ал оңтүстік өңірлерде бірінші онкүндікте түнде температура -8+2 градусқа, күндіз +5+15 градусқа дейін көтеріледі.

Айдың екінші және үшінші онкүндіктерінде еліміздің солтүстік, орталық, шығыс бөліктерінде түнде температура -3+2-ден -8-15 градусқа дейін, кей жерлерде -20-25 градусқа дейін төмендесе, күндіз +5+13-тен 0-8 градусқа дейін өзгереді. Оңтүстік-батыс және оңтүстік Қазақстанда күндіз кей күндері +13+22 градусқа, ал ең оңтүстік өңірлерде +27 градусқа дейін жылынуы мүмкін. Алайда, антициклон әсерінен қысқа мерзімді суық толқындары да күтілуде.