InfoHub Logo

Қазақстанда емханаларға тіркелу тәртібі өзгеруі мүмкін. Денсаулық сақтау министрлігі бұл бағыттағы өзгерістерді әзірлеп, қазір «Ашық НПА» порталында талқылауда. Жаңа ережелердің негізгі жаңалықтары қандай болады?

Бұл туралы Infohub.kz ақпарат агенттігі хабарлайды.

Жылдағы тіркелу науқаны жойылады

Енді азаматтар жылдың кез келген уақытында, жылына бір рет басқа емханаға ауыса алады. Бұрын бұл үшін белгілі бір мерзім күтуге тура келетін. Министрлік өкілі Асель Қыдыралиеваның айтуынша, бұл өзгеріс қаржыландырудың ай сайын жүргізілуіне байланысты.

«Бұрын науқас жаңа емхананы күзде таңдаса, келесі жылдың 1 қаңтарынан бастап қана сонда қызмет ала алатын еді. Жаңа ережелер қабылданса, тіркелуді ауыстырғаннан кейінгі айдан бастап жаңа емханаға бара алады», - дейді ол.

Сонымен қатар, басқа қалаға немесе ауданға көшіп келген жағдайда немесе медициналық ұйым таратылған кезде басқа емханаға тіркелу құқығы сақталады.

Ауданнан тыс емхана таңдауға бола ма?

Жаңа ережелерде емханалардың аумақтық шектерін бөлу тәртібі де нақтыланады. Егер ауданда жаңа емхана ашылса, жергілікті денсаулық сақтау басқармалары сол аумақта жұмыс істейтін басқа медициналық ұйымдардың қызмет көрсету аймақтарын қайта қарастыруға міндеттеледі. Бұл халықты емханалар арасында теңірек бөлуге бағытталған.

Әр емхананың өзіне бекітілген мекенжайлар тізімі бар. Ереже бойынша, олар өз аумағында тұратын азаматтарды тіркеуге міндетті. Бұл – жаяу жүргенде 20 минуттық қашықтық.

Алайда, кейбір жағдайларда ауданнан тыс емхана таңдауға болады. Бұл мүмкіндік тек жүкті әйелдер мен 5 жасқа дейінгі балаларға беріледі. Олар нақты тұратын мекенжайы бойынша емханаға тіркелуі тиіс. Себебі кішкентай балаларға үйде патронаждық қызмет көрсетіледі.

18 жасқа дейінгі балалар ата-анасының біреуімен бірге бір емханада тіркелуі керек. Ата-анасы мен баласы әртүрлі жерде тіркелген болса, емхана басшылығы бұл мәселені реттеуі тиіс.

Студенттер мен әскери қызметшілер қалай тіркеледі?

Шеттен келген студенттер мен медреседе оқитындар жақын маңдағы емханаға электронды үкімет порталы арқылы немесе өтініш жазу арқылы тіркеле алады. 18 жасқа толмағандар үшін ата-анасы немесе заңды өкілі тіркеу жасай алады.

Әскери қызметшілер үшін қызмет уақытында, яғни бір жылға уақытша тіркелу қарастырылады. Олар мұны өз бетінше немесе бөлім командирлерінің көмегімен жасай алады.

Бұл өзгерістер емханаға тіркелу жүйесін ыңғайлы әрі ашық етуге бағытталған. Жаңа ережелер барлық мүдделі мемлекеттік органдармен келісілгеннен кейін бірнеше айдан соң күшіне енеді деп күтілуде.

Қазақстандықтар емханаларға қаншалықты жиі барады?

2025 жылдың 12 айында 16,4 миллионға жуық науқас бастапқы медициналық-санитарлық көмекке жүгінген. Бір жыл ішінде науқастардың емханаға бару жиілігі орта есеппен жылына тоғыз рет болды.

Жалпы алғанда, бастапқы медициналық-санитарлық көмек жүйесінде 79,8 миллион медициналық қызмет көрсетілді. Оның ішінде мемлекеттік емханаларда – 59,1 миллион, жеке клиникаларда – 20,8 миллион қызмет.

2025 жылы медициналық ұйымдар көрсетілген көмек үшін бір триллион теңгеден астам қаражат алды.