InfoHub Logo

13 сәуірден бастап Қазақстанда шетелдік жұмысшыларға арналған жұмысқа рұқсат беру және оны ұзарту қызметі ХҚО-да тоқтатылады. Енді барлық өтінімдер тек онлайн қабылданады.

Бұл туралы Infohub.kz ақпарат агенттігі хабарлайды.

Қызметтің онлайн форматқа көшірілуі

Еңбек иммигранттарына арналған рұқсаттарды беру және ұзарту қызметі толығымен онлайн форматқа көшірілді. Енді бұл қызметті тек eGov.kz немесе migration.enbek.kz порталдары арқылы ғана пайдалануға болады.

Бұл өзгеріс шетел азаматтарына Қазақстан аумағында жеке тұлғалардың үй шаруашылығында жұмыс істеуге рұқсатты онлайн рәсімдеуге немесе ұзартуға мүмкіндік береді. Бұрын қажет болған кейбір құжаттарды қолмен жүктеу талабы алынып тасталды. Мысалы, медициналық анықтама мен сақтандыру мәліметтері мемлекеттік жүйелерден автоматты түрде алынады.

Цифрлық даму министрлігінің хабарлауынша

Электрондық үкіметтің eGov.kz порталында еңбек иммигранттарына рұқсат беру қызметі бойынша барлық қажетті интеграциялар жүзеге асырылған. Бұл медициналық тексеру, сақтандыру және салық төлемдерін автоматты түрде тексеруді қамтиды.

«13 сәуірден бастап ХҚО арқылы бұл қызметті көрсету тоқтатылады. Енді өтінімдерді қабылдау тек egov.kz немесе migration.enbek.kz арқылы онлайн жүзеге асырылады», — деп атап өтті Цифрлық даму бірінші вице-министрі Ростислав Коняшкин.

Рұқсаттар қандай мерзімге беріледі?

Рұқсат беру немесе ұзарту туралы шешімді облыстық маңызы бар қалалар мен аудандардың әкімдіктері, ішкі істер органдарының аумақтық бөлімшелерімен келісімнен кейін қабылдайды. Рұқсат еңбек иммигранттарын тартуға белгіленген квота шеңберінде 1-ден 12 айға дейінгі мерзімге беріледі. Қосымша ақпаратты eGov.kz порталынан және оның әлеуметтік желілерінен табуға болады.