InfoHub Logo

Фигуралы сырғанаудан Олимпиада ойындарында төрелік еткен қазақстандық Надежда Парецкаяға қатысты дау туды. Ол ресейлік спортшыларға тым жоғары, ал америкалық және жапон спортшыларына төмен баға қойды деп айыпталуда. Ұлттық Олимпиада комитеті бұл жағдайға қатысты пікір білдірді.

Бұл туралы Infohub.kz ақпарат агенттігі хабарлайды.

Forbes басылымының жазуынша, Надежда Парецкая ресейлік Аделия Петросянның төрт мәртелік айналымдағы секірісіндегі елеулі қателігіне қарамастан, оны бірінші орынға шығарған. Бұл бағалау, егер басқа қатысушылар да Петросян сияқты ауыр қателіктер жіберсе, ақталуы мүмкін еді. Алайда, басылым мәліметінше, басқа спортшылар өнерлерін жоғары деңгейде көрсеткен.

Төрешілерді кім тағайындайды?

Халықаралық конькимен сырғанау одағы (ISU) өкілі бағалаудағы айырмашылықтарды қалыпты жағдай деп атап, әр элемент бойынша ең жоғары және ең төмен баллдарды есепке алмау әдеттегі тәжірибе екенін айтты. Одақ бағалаулардың әділ және адал берілгеніне сенім білдірген.

Ұлттық Олимпиада комитетінің жауабы

Қазақстан Ұлттық Олимпиада комитеті (ҰОК) Олимпиада ойындарына төрешілерді тағайындау өз құзыретіне жатпайтынын мәлімдеді. Бұл функциялар толығымен халықаралық спорт федерацияларының, атап айтқанда, конькимен сырғанау спорты бойынша ISU-дің құзыретінде екені айтылды. ISU Олимпиада ойындарында жұмыс істеуге рұқсат етілген мамандардың құрамын өз бетінше анықтайды.

ҰОК-тың хабарлауынша, кандидаттарды таңдауда ISU халықаралық төрешілік санатының болуына, расталған біліктілігіне және ірі халықаралық жарыстардағы тәжірибесіне сүйенеді. Ұлттық Олимпиада комитеттері бұл процеске ықпал етпейді және шешім қабылдауға қатыспайды. Олимпиада ойындарындағы төрешілер ISU ережелері аясында жұмыс істейтін тәуелсіз техникалық мамандар ретінде әрекет етеді.