InfoHub Logo

Қырғызстан мен Тәжікстан шекара мәселесін шешіп,келісімге қол қойылды.Бұл туралы Infohub.kz тілшісі хабарлайды.

13 наурызда Қырғызстан президенті Садыр Жапаров пен Тәжікстан басшысы Эмомали Рахмон екі ел арасындағы мемлекеттік шекараның делимитациясы мен демаркациясы туралы тарихи келісімге қол қойды. Бұл келіссөздер Қырғызстан президентінің әкімшілігі орналасқан «Ынтымак Ордо» ғимаратында өтті.

Ресми ақпаратқа сәйкес, мемлекет басшылары шекара қызметінің басшыларына екі ел арасындағы өткізу бекеттерін қайта ашуға рұқсат берді. Осы шешімнің нәтижесінде «Қайрагач» (Лейлек ауданы) және «Қызыл-Бель» (Баткен ауданы) бекеттері қайта жұмыс істей бастайды. Бұл шекара бекеттері 2021 жылы екі ел арасындағы қақтығыстардан кейін жабылған болатын.

Қырғызстан мен Тәжікстан арасындағы шекара мәселесі ұзақ жылдар бойы екіжақты қарым-қатынастардың басты түйткілдерінің бірі болып келді. Кеңес Одағы тарағаннан кейін екі елдің арасындағы 970 шақырымдық шекараның кейбір бөліктері нақты белгіленбей қалған. Соның салдарынан соңғы жылдары екі мемлекет арасында бірнеше рет қарулы қақтығыстар орын алды.

Биылғы 21 ақпанда Қырғызстан мен Тәжікстан үкіметтік делегациялары шекара мәселесіне қатысты қорытынды хаттамаға қол қойған болатын. Бұл келіссөздер нәтижесінде тараптар шекараны толық анықтау және даулы аймақтарды реттеу туралы ортақ шешімге келді.

Бұл келісім екі ел арасындағы бейбітшілік пен тұрақтылықты нығайтуға бағытталған маңызды қадам болып отыр. Сарапшылардың пікірінше, шекара бекеттерінің қайта ашылуы экономикалық және әлеуметтік байланыстарды жандандырып, шекара маңындағы тұрғындардың өміріне оң әсер етеді.

Қырғызстан мен Тәжікстан басшыларының қол қойған бұл келісімі аймақтағы қауіпсіздік пен ынтымақтастықты нығайтуға үлкен үлес қосады деп күтілуде.