InfoHub Logo

Қазақстанда әдетте бір мықты басшысы бар, жоғарыдан төмен қарай жүйесі қалыптасқан ауылдарды үлгі тұтады. Алайда, Қызылорда облысындағы Бесарық ауылы мүлдем басқаша даму үлгісін көрсетеді. Мұнда 450 отбасы 20 жыл бойы ешбір жеке иесінсіз, ұжымдық негізде миллиард теңгеге жуық табыс әкелетін шаруашылық құрған. Бұл туралы блогер және агрофермер Жұлдыз Ғафарова мәлімдеді.

Бұл туралы Infohub.kz ақпарат агенттігі хабарлайды.

Ұжымдық шаруашылықтың нәтижесі

Бесарық ауылының тұрғындары бірлесіп 10 мың бас ірі қара мал бағып, мың гектар жерге күріш егеді. Бұл шамамен 580 миллион теңгеге жуық шикі күріш сатылымынан түсетін табыс болса, тазартылған күріштің көлемінде бұл көрсеткіш 960 миллион теңгеге жетеді. Яғни, 450 отбасы жылына шамамен бір миллиард теңге табыс табады.

Бұл үлгінің «Родина» ауылынан басты айырмашылығы – мұнда бәрін бір адамның бастап, салып шығуы болмаған. Тұрғындар бұл жүйені 20 жыл бойы бірлесіп, ұжымдық негізде құрған.

Бизнес-инкубатор және кооператив

2024 жылы «Ауыл Аманаты» мемлекеттік бағдарламасы аясында ауылда жергілікті кәсіпкерлер үшін тегін бизнес-инкубатор іске қосылды. Жобаға 642 миллион теңге жұмсалып, оның 465 миллион теңгесін «Абай-Дәулет» ЖШС бөлді. Қазіргі таңда мұнда жартылай фабрикаттар, картоп-фри, кондитерлік және нан-тоқаш өнімдерін, пластик ыдыс, сабын, ағаш және тоқыма бұйымдарын шығаратын цехтер жұмыс істейді. Бұл 25 жаңа жұмыс орнын ашты.

Инкубатор резиденттерінің бірі, Гүлзира Рысым 6 миллион теңге жеңілдікті несие алып, жұмыс қолғаптарын шығаратын өндіріс ашқан. Оның айтуынша, өнімге сұраныс жоғары, бағасы нарықтықтан төмен.

Сондай-ақ, 2024 жылы ауылда «Сыр Құсы» атты ауылшаруашылық өндірістік кооперативі құрылып, жылына 100 тонна құс етін өндіру қуаттылығына ие болды. Өнімдер қазірдің өзінде облыс сауда орындарына жеткізілуде.

Әлеуметтік жауапкершілік

Бесарық ауылында 2400 адам тұрады. Мұнда 360 орындық мектеп, 120 орындық балабақша, 10 үйірмесі бар мәдениет үйі, күндізгі стационары бар амбулатория, 14 дәрігер және жедел жәрдем көлігі бар. 2024 жылғы мектеп бітірушілердің орташа балы – 80%, үшеуі «Алтын белгі» иеленді.

2024 жылдың қорытындысы бойынша Бесарық ауылы «Үлгілі елді мекен» байқауының жеңімпазы атанды.