InfoHub Logo

Қазақстанның ең танымал спортшыларының бірі, волейболшы Сабина Алтынбекова "Астана" клубымен келісімшартты бұзды. Бұл командаға спортшы осы маусым басталмай тұрып қосылған болатын.

Бұл туралы Infohub.kz ақпарат агенттігі хабарлайды.

Клубтан кету себебі

29 жастағы қазақстандық волейболшы, әлеуметтік желіде миллионнан астам адам бақылайтын Сабина Алтынбекова 2025 жылдың қыркүйек айында "Астана" командасымен келісімшартқа отырғанын хабарлаған еді. Алайда, бүгін, 16 ақпанда инсайдерлер оның командада ойнамайтынын жеткізді.

Tengri Sport тілшісі клубтың баспасөз қызметіне хабарласқанда, келісімшарттың бұзылғаны расталды. "Иә, келісімшарт тараптардың өзара келісімі бойынша бұзылды", - деп хабарлады "Астана" клубынан.

Биылғы маусымда команда 18 кездесу өткізгенімен, бірде-бір рет жеңіске жете алмай, ел чемпионатында соңғы орынды иеленіп отыр.

Сабина Алтынбекова – Қазақстан волейболының жұлдызы

Алтынбекова 17 жасынан бастап Қазақстанның әртүрлі жастағы құрама командаларына шақырыла бастады. Ал 2014 жылы Азия жасөспірімдер чемпионатында нағыз жұлдызға айналып, турнирдің ең сұлу спортшысы атанды.

Танымалдылыққа ие болғаннан кейін Алтынбекова шетелдік командаларда өнер көрсетті: Жапонияның "GSS Sunbeams", БАӘ-нің "Аль-Васл" және Индонезияның "Yogya Falcons" клубтарында ойнады.

Сонымен қатар, Сабинаның бірінші некесінен бір баласы бар, бұл неке 2025 жылдың басында ажырасумен аяқталған.