InfoHub Logo

Сатпаев қалалық ауруханасында дәрігерлер мен қызметкерлер Наурыз мейрамын жұмыс орнында, тіпті жұмыс уақытында тойлап, ішімдік ішкен. Бұл жағдайды бейнеге түсіріп, желіге жүктеген. Видеода мас күйдегі кезекші дәрігер көрінеді. Оқиғадан кейін облыстық денсаулық сақтау басқармасы тексеру жүргізді.

Бұл туралы Infohub.kz ақпарат агенттігі хабарлайды.

Не белгілі болды?

Instagram желісіндегі etozhez парақшасында аурухана ішіндегі тойды көрсететін видео пайда болды. Видео авторының айтуынша, сол күні бір науқасқа көмек көрсетуден бас тартқан. Ал кезекші дәрігердің өзі мас күйде болған.

Облыстық денсаулық сақтау басқармасы бұл ақпаратты растады. «Мекеме басшылығы мұндай шара өткізуге рұқсат бермеген, сондай-ақ болған жағдай туралы басқармаға уақытылы хабарламаған», - деп атап өтті басқарма өкілдері.

Жаза

Оқиғаның салдары ауыр болды. Кезекші дәрігер еңбек кодексінің тиісті бабымен жұмыстан босатылды. Директордың міндетін атқарушыға және екі медбикеге қатаң сөгіс жарияланды. Аурухана директорының жұмыстан шығарылу мәселесі әзірге оның ауруханада жатқанына байланысты кейінге шегерілді.