InfoHub Logo

Түркияда туу көрсеткішінің азаюына байланысты демографиялық дағдарыс қаупі төніп тұр. Бұл мәселені шешу жолдарын іздеген елде, Түркия Ұлттық қорғаныс университетінің ректоры Эрхан Афьонджу Қазақстанның көп балалы аналарды қолдау тәжірибесін үлгі етуді ұсынды.

Бұл туралы Infohub.kz ақпарат агенттігі хабарлайды.

Аналарға мемлекеттік қолдау

Профессор Афьонджудың айтуынша, үш баласы бар аналарға мемлекет тарапынан жалақы төлеп, зейнетақы тағайындау қажет. Ол бұл шаралардың Түркиядағы туу көрсеткішін арттыруға оң ықпал ететініне сенімді.

«Қазақстан бұған дейін мұндай тәжірибені қолданған және ол өте жақсы нәтижелер көрсетті», - деді Афьонджу.

Түркиядағы демографиялық ахуал

Түркияда туу көрсеткіші соңғы жылдары айтарлықтай төмендеген. Егер бұрын әйел басына шаққанда 2,40 бала болса, қазір бұл көрсеткіш 1,40-қа дейін азайған. Мамандар мұның себебін қалалану, өмір сүру құнының өсуі және отбасыға деген көзқарастың өзгеруімен байланыстырады.

«Қоғамда көп балалы болудың жаман екендігі туралы пікір қалыптаса бастады», - деп атап өтті Афьонджу.

Мемлекеттік шаралар

Түркияда бұл мәселе бірнеше жылдан бері көтеріліп келеді. Президент Режеп Тайып Ердоған бұл жағдайды «демографиялық апат» деп атап, 2026-2035 жылдарды «Отбасы және халық санының онжылдығы» деп жариялап, отбасын, неке мен тууды қолдауға бағытталған мемлекеттік шараларды күшейту туралы жарлыққа қол қойған болатын.