ساۋدا جانە ينتەگراسيا مينيسترلىگىنىڭ مالىمەتىنشە، 2026 جىلدىڭ ءبىرىنشى جارتىجىلدىعىندا قازاقستان تۇتىنۋشىلارى اقاۋلى ونىمدەر مەن ساپاسىز قىزمەتتەر ءۇشىن 1،5 ملرد تەڭگە قايتارىپ الدى. قايتارىم سوماسى وتكەن جىلدىڭ وسى كەزەڭىمەن سالىستىرعاندا 15،3% وسكەن، دەپ حابارلايدى infohub.kz سايتى.
شاعىمداردى قاراۋ ناتيجەسىندە 15 مىڭ تۇتىنۋشىنىڭ تالاپتارى قاناعاتتاندىرىلدى. تاعى 15،4 مىڭ ادام زاڭگەرلىك كومەك پەن كەڭەس الدى، ال 12 مىڭ ازاماتتىڭ ءوتىنىشى ءتيىستى مەملەكەتتىك ورگاندارعا جىبەرىلدى.
ساتىپ الۋشىلاردىڭ شاعىمدارى نەگىزىندە اۋماقتىق دەپارتامەنتتەر 776 تەكسەرۋ جۇرگىزدى. ناتيجەسىندە 892 اكىمشىلىك ءىس قوزعالىپ، سالىنعان ايىپپۇلداردىڭ جالپى سوماسى 17،3 ملن تەڭگەگە جەتتى.
ەڭ ءىرى قايتارىمداردىڭ ءبىرى – Lexus LX 600 اۆتوكولىگىنىڭ ساتىپ الۋشىسىنا وتەماقى تولەۋ. دەپارتامەنتتىڭ قۇقىقتىق قولداۋىنان كەيىن «Toyota Tsusho Kazakhstan Auto» ج ش س كومپانياسى تۇتىنۋشىعا كولىكتىڭ تولىق قۇنىن – 79،49 ملن تەڭگەنى قايتاردى.
جىلجىمايتىن م ۇلىك ساتىپ الۋشىلارى دا ەداۋىر سومالاردى قايتارىپ الدى. ماڭعىستاۋ وبلىسىندا «Tuha Development» تۇرعىن ءۇي قۇرىلىس كووپەراتيۆىمەن ۇلەستىك قاتىسۋ شارتى بويىنشا داۋ سوتسىز رەتتەلدى: تۇتىنۋشىعا 14 ملن تەڭگەدەن استام تولەندى. شىمكەنتتە «كانفار بيۋلدينگ» جشس-نەن ساتىپ الىنعان پاتەردىڭ ساتىپ الۋشىسى تۇرعىن ۇيدەن انىقتالعان كەمشىلىكتەر تۋرالى شاعىمدى قاراۋ ناتيجەسىندە 15،1 ملن تەڭگەنى قايتارىپ الدى.
سونىمەن قاتار قازاقستاندا «ساپالى ءونىم» جوباسى اياسىندا ءونىمنىڭ قاۋىپسىزدىگى مەن ساپاسىن تەكسەرۋ جالعاستى. جارتىجىلدىقتا ماماندار 874 تاۋار ءتۇرىن زەرتتەپ، 623 اتاۋ بويىنشا بۇزۋشىلىقتار انىقتادى. انىقتالعان جاعدايلاردىڭ باسىم بولىگى (84%) دۇرىس تاڭبالانباۋعا بايلانىستى بولسا، تاعى 16% سانيتارلىق-ەپيدەميولوگيالىق تالاپتارعا قاتىستى. تەكسەرۋ قورىتىندىسى بويىنشا 462 كاسىپكەرگە قاتىستى شارا قولدانىلدى.