InfoHub Logo

قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازاربايەۆتىڭ 1996 جىلعى جارلىعى بويىنشا 1 مامىر قازاقستان حالىقتارىنىڭ بىرلىگى كۇنى رەتىندە اتالىپ وتۋدە. 100-دەن استام ۇلت تۇراتىن قازاقستان حالقى ءۇشىن بۇل مەرەكەنىڭ ورنى بولەك. قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ 1995 جىلعى 1 ناۋرىزداعى جارلىعى نەگىزىندە ەلباسى جانىنان كەڭەسشى-قاتىسۋشى ورگان رەتىندە دۇنيە جۇزىنە ۇلگى بولىپ وتىرعان، ۇلتارالىق تاتۋلىق پەن تۇراقتىلىقتىڭ فەنومەنى – قازاقستان حالىقتارى اسسامبلەياسى قۇرىلدى. بۇل ەشبىر ەلدە بولماعان ەرەكشە، ساياسي ماڭىزى زور قۇرىلىم.

اسسامبلەيا 365 مۇشەسى، 471-دەن استام رەسپۋبليكالىق، وڭىرلىك، وبلىستىق، قالالىق ۇلتتىق-مادەني بىرلەستىكتەرى 500-گە جۋىق كىشى اسسامبلەيا مۇشەلەرىنىڭ باستارىن بىرىكتىرىپ، ءبىزدىڭ ورتاق ءۇيىمىز – قازاقستاندا شىنايى دوستىقتى قامتاماسىز ەتىپ كەلەدى. بۇگىندە ءاربىر ۇلتقا سالت-داستۇرلەرىن جاڭعىرتۋعا، مادەنيەتى مەن ادەبيەتىن دامىتۋعا، ءتىلىنىڭ جەتىلۋىنە قامقورلىق كورسەتىلۋدە. وسىنىڭ ءبارى ەلباسىنىڭ قوعامداعى ازاماتتىق ىنتىماقتاستىق پەن ىشكى ساياسي تۇراقتىلىقتى ساقتاۋ ستراتەگياسىن دۇرىس تاڭداپ، ۇلتارالىق قاتىناستاردى رەتتەۋدىڭ ءتيىمدى تەتىكتەرىن جاساي ءبىلۋىنىڭ ارقاسىندا مۇمكىن بولۋدا.

ءوزارا تۇسىنىستىك، ۇستامدىلىق، ءار ءتۇرلى ۇلتتار وكىلدەرىنىڭ رۋحاني جانە مادەني قۇندىلىقتارىنا قۇرمەتپەن قاراۋ ادەبى بارلىق ەتنوستارعا ورتاق جالپى حالىقتىق يدەالدار مەن قاسيەتتەردى قالىپتاستىرۋعا اسەر ەتتى. ناتيجەسىندە ءاربىر ۇلت كونستيتۋسيالىق-قۇقىقتىق زاڭناما نەگىزىندە وزىنە ءتان ەتنوستىق ەرەكشەلىگىن ساقتاي وتىرىپ، قازاقستاننىڭ قوعامدىق قۇرىلىمىنا ۇيلەستى.

ەلباسىنىڭ قازاقستان حالقىنا جولداۋىندا ايتىلعان ماسەلەلەر قاتارىندا ەرەكشە كورسەتىلىپ كەتكەن باعىتتىڭ ءبىرى — قازاقستان حالىقتارى اسسامبلەياسىنىڭ ءرولىن نىعايتۋعا بايلانىستى “قوعامدىق كەلىسىمدى جانە تۇراقتىلىقتى ءارى قاراي نىعايتۋ ءۇشىن قازاقستان حالىقتارى اسسامبلەياسىنىڭ ءرولىن ارتتىرۋ” ماسەلەسى. باعىتتىڭ بۇلاي اتالۋىنىڭ ءوزى وزىندىك ەتنوسارالىق جانە كونفەسسياارالىق كەلىسىمنىڭ جەتىلدىرىلگەن مودەلى قالىپتاسقان اسسامبلەيانىڭ ۇلتارالىق قارىم-قاتىناستى نىعايتۋداعى ەرەكشە ورگان بولىپ تابىلاتىندىعىن كورسەتەدى. 

---