قازاقستاندا 2026-2027 وقۋ جىلىنا شامامەن 75 مىڭ ءبىلىم گرانتى ءبولىندى، وعان 127 مىڭ تالاپكەر ۇمىتتەنۋدە، دەپ حابارلايدى infohub.kz سايتى.
عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى جاننا ەسىنباەۆانىڭ ايتۋىنشا، مەملەكەتتىك ءبىلىم تاپسىرىسى ەڭبەك نارىعىنىڭ بىلىكتى ماماندارعا دەگەن قاجەتتىلىگىن ەسكەرە وتىرىپ قالىپتاستىرىلادى. بيىل گرانتتاردىڭ 60 پايىزى ينجەنەرلىك-تەحنيكالىق مامانداردى دايارلاۋعا، 20 پايىزى پەداگوگيكالىق باعىتتارعا، قالعان 20 پايىزى باسقا ماماندىقتارعا باعىتتالدى.
«گرانتتار كونكۋرستىق نەگىزدە ۇبت ناتيجەلەرى، تاڭدالعان ءبىلىم بەرۋ باعدارلامالارى مەن جوعارى وقۋ ورىندارى، سونداي-اق زاڭنامادا بەلگىلەنگەن كۆوتالار ەسكەرىلە وتىرىپ ءبولىندى»، — دەپ اتاپ ءوتتى ەسىنباەۆا.
بولاشاق ستۋدەنتتەر اراسىندا «اۋدارما ءىسى»، «حالىقارالىق قاتىناستار»، «قۇقىقتانۋ»، «پسيحولوگيا»، «قارجى» باعدارلامالارى، سونداي-اق پەداگوگيكالىق باعىتتار ەرەكشە تانىمال بولدى.
ءبىلىم گرانتتارىن تاعايىنداۋ بويىنشا كونكۋرس قورىتىندىلارى رەسپۋبليكالىق كونكۋرستىق كوميسسيا وتىرىسىندا بەكىتىلدى. ناتيجەلەر عىلىم جانە جوعارى ءبىلىم ءمينيسترى ساياسات نۇربەكتىڭ رەسمي پاراقشاسىندا جانە مينيسترلىكتىڭ سايتىندا جاريالاناتىن بولادى.