رەسەيمەن شەكارادا قازاقستان اۋماعىنا ءىرى پارتيا تاۋىق جۇمىرتقاسىن زاڭسىز اكەلۋ ارەكەتىنىڭ جولى كەسىلدى: 20 توننا ءونىمى بار جۇك كولىگى ەلگە كىرگىزىلمەدى، دەپ حابارلايدى infohub.kz.
رەسپۋبليكا اۋىل شارۋاشىلىعى مينيسترلىگىندە ايتىلعانداي، وقيعا باتىس قازاقستان وبلىسىنداعى «سىرىم» ۆەتەريناريالىق باقىلاۋ بەكەتىندە بولعان. ۆەدومستۆو قىزمەتكەرلەرى سامارا (رف) — استانا باعىتىمەن كەلە جاتقان جۇك كولىگىن تەكسەرۋ ءۇشىن توقتاتقان.
تەكسەرۋ بارىسىندا 20 توننا تاعامدىق تاۋىق جۇمىرتقاسىن تاسىمالداۋ زاڭنامادا كوزدەلگەن ۆەتەريناريالىق ىلەسپە قۇجاتتارسىز جۇزەگە اسىرىلعانى انىقتالدى. وسىعان بايلانىستى كولىك قۇرالى جۇكپەن بىرگە كەرى قايتارىلدى. جۇرگىزۋشىگە قاتىستى اكىمشىلىك حاتتاما تولتىرىلىپ، ايىپپۇل سالىندى.
تاسىمالداۋشى وكىلدەرىنە قازاقستان مەن ەۋرازيالىق ەكونوميكالىق وداقتىڭ ۆەتەريناريالىق زاڭناماسىنىڭ تالاپتارى ءتۇسىندىرىلدى.
اۋىل شارۋاشىلىعى مينيسترلىگىندە 2026 جىلدىڭ 21 ساۋىرىنەن باستاپ التى اي مەرزىمگە ءۇشىنشى ەلدەردەن جانە ەاەو مۇشە مەملەكەتتەرىنەن بارلىق كولىك تۇرىمەن تاۋىق جۇمىرتقاسىن قازاقستان اۋماعىنا اكەلۋگە تىيىم سالىنعانىن ەسكە سالدى. بۇل شارالار ءونىمنىڭ اكەلىنۋىن رەتتەۋگە جانە ەلدىڭ ۆەتەريناريالىق-سانيتاريالىق جانە ەپيزووتيالىق تۇراقتىلىعىن قامتاماسىز ەتۋگە باعىتتالعان.