2018 جىلدان باستاپ بارلىق مەكتەپتەردە «قازاقستان تاريحى» ءپانى قازاق تىلىندە وقىتىلادى. بۇل تۋرالى بۇگىن ورتالىق كوممۋنيكاسيالار قىزمەتىندە وتكەن ءباسپاسوز ءماسليحاتىندا ق ر بعم ۆيسە-مينيسترى تاقير بالىقبايەۆ ءمالىم ەتتى.
«2018-2019 وقۋ جىلىنان باستاپ، بارلىق مەكتەپتەردە «قازاقستان تاريحى» ءپانى قازاق تىلىندە، «دۇنيەجۇزى تاريحى» ورىس تىلىندە جانە ءبىرقاتار پاندەر اعىلشىن تىلىندە وقىتىلادى دەپ جوسپارلاپ وتىرمىز. ولار: ينفورماتيكا، حيميا، بيولوگيا جانە فيزيكا پاندەرى»، - دەپ ءتۇسىندىردى ت.بالىقبايەۆ.
سونىمەن قاتار ەلدەگى مەكتەپتەردە اعىلشىن ءتىلىن وقىتۋ ساعاتتارى كەزەڭ-كەزەڭىمەن ۇلعايتىلادى.
«بىزدە بىرنەشە جىل بۇرىن اعىلشىن ءتىلىن ءبىرىنشى سىنىپتاردان باستاپ وقىتۋ ەنگىزىلگەن بولاتىن. بيىلدان باستاپ، ءبىز اعىلشىن ءتىلىن وقىتۋ ساعاتتارىن اپتاسىنا 1-دەن 2 ساعاتقا دەيىن كوبەيتتىك. ءبىزدىڭ ماقساتىمىز - بالالاردىڭ باستاۋىش سىنىپتاردان باستاپ اعىلشىن تىلىندە سويلەسۋدىڭ باستاپقى دەڭگەيىن مەڭگەرۋىن قامتاماسىز ەتۋ. ونىڭ ۇستىنە 2018-2019 وقۋ جىلىندا قازاقستاندا ءۇش ءتىلدى وقىتۋ مودەلى ەنگىزىلگەننەن كەيىن، ءبىرقاتار پاندەردى قازاق، ورىس، اعىلشىن تىلدەرىندە وقىتىلادى»، - دەدى ۆيسە-مينيستر.
inform.kz