2029 جىل - توقايەۆتىڭ تىنىش كەتۋى مە، الدە بيلىكتىڭ جاڭا پاراعى ما؟
قازاقستان پرەزيدەنتى قاسىم-جومارت توقايەۆ 2029 جىلى ءوزىنىڭ وكىلەتى اياقتالعان سوڭ، مەملەكەت باسشىسى قىزمەتىنەن كەتەتىنىن مالىمدەدى. بۇل تۋرالى ول حالىقارالىق Al Jazeera تەلەارناسىنا بەرگەن سۇحباتىندا ايتتى. پرەزيدەنتتىڭ ءسوزى قىسقا، ءبىراق سالماقتى: «پرەزيدەنت – قۇدايدىڭ ەلشىسى ەمەس، حالىق جالداعان مەنەدجەر».
بۇل – ساياسي ەليتاعا دا، حالىققا دا باعىتتالعان اشىق سيگنال. جەكە شەشىم رەتىندە ۇسىنىلعان بۇل مالىمدەمە — شىن مانىندە، قازاقستانداعى بيلىك ءترانزيتىنىڭ ناقتى مەرزىمى مەن باعىتىن بەلگىلەيتىن تۇجىرىم. ءسوز جۇزىندە ەمەس، كونستيتۋسيادا تايعا تاڭبا باسقانداي كورسەتىلگەن 7 جىلدىق ءبىر مەرزىم تۋرالى باپ توقايەۆتىڭ بۇل شەشىمىن فورمالدىلىقتان ساياسي مالىمدەمەگە اينالدىرادى.
2019 جىلى نازاربايەۆ داۋىرىنەن كەيىن ەل تىزگىنىن العان توقايەۆ، 2022 جىلعى سايلاۋدا 81،3% داۋىسپەن جەڭىپ، كونستيتۋسيالىق رەفورمالار جۇرگىزدى. سونىڭ ىشىندە ەڭ ماڭىزدى وزگەرىس – پرەزيدەنتتىڭ تەك ءبىر رەت، جەتى جىلعا سايلانۋ مۇمكىندىگى. بۇل وزدىگىنەن بيلىكتىڭ اۋىسۋى تۋرالى ماسەلەنى ەرتە كۇننەن كۇن تارتىبىنە شىعاردى.
الايدا ەلدە قالىپتاسقان ساياسي مادەنيەت پەن باسقارۋ ۆەرتيكالى شىن مانىندە بۇل ۋادەنىڭ ورىندالاتىنىنا كۇمانمەن قارايتىنداردى ازايتپاي وتىر. قازاقستاندا "كەتەمىن" دەگەن ءاربىر باسشىنىڭ سوڭعى ءسوزىنىڭ ارتى ساياسي مانيەۆرگە ۇلاسقانى دا بار. سوندىقتان توقايەۆتىڭ 2029 جىلدى ناقتى مەجەلەۋى – بيلىككە بەرىك جاۋاپكەرشىلىكپەن ەمەس، جۇيەنى بەيبىت تۇردە قالدىرۋعا ازىرلىكتىڭ بەلگىسى رەتىندە قابىلدانۋى مۇمكىن.
ءبىر قىزىعى – بۇل جولعى ريتوريكادا "ۇلت تاعدىرى"، "تاريحي ميسسيا" سەكىلدى پافوستى تىركەستەر جوق. "جالدامالى مەنەدجەر" دەگەن تىركەس ارقىلى توقايەۆ ءوز بيلىگىنىڭ ءمانىن پراگماتيكالىق تۇرعىدان سيپاتتادى. بۇل – ورتالىق ازياداعى اۆتوكراتيالىق ساياسي ريتوريكادان مۇلدە بولەك باعىت.
ءبىراق سۇراقتار كوپ:
جاڭا پرەزيدەنت قانداي جاعدايدا سايلانادى؟
توقايەۆتىڭ رەفورمالىق باعىتىن جالعاستىرا الا ما؟
جۇيە بيلىك اۋىسۋىنا دايىن با، الدە ىشكى ەليتا كۇرەسى كۇشەيە مە؟
ساياسي ساحنادا ۋاقىتشا اكتەر بولمايدى. ءار قادام — كەلەسى قادامنىڭ كورىنىسى. سوندىقتان 2029 – جاي كۇنتىزبەدەگى جىل ەمەس، قازىرگى رەجيمنىڭ قانشالىقتى وزگەرىسكە قابىلەتتى ەكەنىن ايقىندايتىن مەجەلى ۋاقىت.
You Might Also Like
-
مامىر ايىنىڭ سوڭىندا استانادا حالىقارالىق كەزدەسۋلەردىڭ لەگى وتپەك. پرەزيدەنت قاسىم-جومارت توقايەۆ ءبىر اپتا ىشىندە ءبىرقاتار ەلدىڭ جوعارى لاۋازىمدى وكىلدەرىن قابىلداپ، ماڭىزدى ءىس-شارالارعا قاتىسادى.
-
مەملەكەت جەكەمەنشىك مەكتەپتەردىڭ باستاۋىش سىنىپ وقۋشىلارىن تەگىن تاماقتاندىرۋعا 12 ملرد تەڭگەدەن استام قارجى ءبولدى،دەپ جازادى ينفوحاب.
