22 شىلدە كۇنى ماسكەۋ ۋاقىتىمەن ساعات 09:35-تە كۇندە سوڭعى ەكى اپتاداعى ەڭ قۋاتتى جارىلىس بولدى، دەپ حابارلايدى infohub.kz سايتى.
وقيعا كۇن بەلسەندىلىگىنىڭ ايتارلىقتاي ارتۋى اياسىندا تىركەلدى، دەپ مالىمدەدى رعا عارىشتىق زەرتتەۋلەر ينستيتۋتىنىڭ كۇن استرونومياسى زەرتحاناسى. سوڭعى تاۋلىكتە ماماندار شامامەن 20 جارىلىستى تىركەدى، ال بىرنەشە كۇن بۇرىن جۇلدىزدا كۇنىنە 1–2 عانا وسىنداي وقيعا بايقالعان ەدى.
گەوەففەكتيۆتى ايماقتاردا بولىپ جاتقان جارىلىستار جەرگە اسەر ەتۋى ىقتيمال، الايدا ءقازىر پلانەتاعا تىكەلەي ءقاۋىپ جوق. عارىشتىق اۋا رايىنىڭ باستى فاكتورى – ۇلكەن تاجدىك تەسىك، ونىڭ سالدارىنان ءالسىز جانە ورتاشا قارقىندى ماگنيتتىك داۋىلداردىڭ ىقتيمالدىعى جوعارى بولىپ وتىر. گەوماگنيتتىك كورسەتكىشتەر ءقازىردىڭ وزىندە جوعارى، ءبىراق ءالى تولىق داۋىل دەڭگەيىنە جەتكەن جوق.
عالىمداردىڭ پايىمداۋىنشا، كۇن بەلسەندىلىگى ارتا ءتۇسۋى مۇمكىن: الداعى بىر-ەكى كۇندە ەڭ جوعارى X كلاسىنداعى جارىلىستار بولۋى ىقتيمال. قازىرگى ءورشۋ ءىرى وقشاۋلانعان كۇن داقتارىنىڭ №4493 توبىمەن بايلانىستى جەرگىلىكتى قۇبىلىس رەتىندە قاراستىرىلۋدا. سونىمەن قاتار، كۇن بەلسەندىلىگىنىڭ جالپى دەڭگەيى ءالى دە تومەن بولىپ باعالانۋدا.
جارىلىستىڭ بەينەجازباسى جوق: وقيعا كەزىندە كۇندى باقىلايتىن SDO سەرىگى جەردىڭ كولەڭكەسىندە بولىپ، وقيعانى تىركەي المادى.