تۇركىستان وبلىسىندا ۇيىمداسقان توپتىڭ 27 مۇشەسى بيۋدجەتتەن 3 ملرد تەڭگەدەن استام قاراجات جىمقىرعانى ءۇشىن سوتتالدى. سوت ءاربىر سوتتالۋشىعا قىلمىستىق سحەماداعى رولىنە قاراي 6 جىلدان 8 جىلعا دەيىن باس بوستاندىعىنان ايىرۋ جازاسىن كەستى، دەپ حابارلايدى infohub.kz.
ءىس ماتەريالدارىنا سايكەس، 2016-2021 جىلدار ارالىعىندا «كت ياسسى نەسيە» ج ش س باسشىلىعى «اگرارلىق نەسيە كورپوراسياسى» اق-نىڭ اگروبيزنەستى قولداۋ باعدارلاماسى اياسىندا ءىرى قارا مال ساتىپ الۋعا بولىنگەن قاراجاتىن جىمقىرۋعا باعىتتالعان اۋقىمدى الاياقتىق سحەمانى ۇيىمداستىرعان.
توپ مۇشەلەرى جالعان شارۋا قوجالىقتارى مەن جەكە كاسىپكەرلەردى تىركەۋ ءۇشىن اتاۋلى تۇلعالاردى پايدالانعان. نەسيە الۋعا وتىنىمدەر جالعان بيزنەس-جوسپارلار مەن قۇجاتتارمەن، سونداي-اق جوق كەپىل مۇلكىمەن بىرگە ۇسىنىلعان. نەسيە ماماندارى جالعان قۇجاتتاردى دايىنداپ، نەسيە بەرۋدىڭ زاڭدىلىعىنىڭ كورىنىسىن جاساعان. باعالاۋشىلار مەن كەپىلدى قامتاماسىز ەتۋ ماماندارى ءىس جۇزىندە جوق نەمەسە مالىمدەلگەن قۇنىنا سايكەس كەلمەيتىن م ۇلىكتىڭ بار ەكەنىن راستاپ، دۇرىس ەمەس باعالاۋ ەسەپتەرىن رەسىمدەگەن. نوتاريۋستار اقشالاي سىياقى ءۇشىن جالعان قۇجاتتاردى كۋالاندىرعان.
تەرگەۋ ناتيجەسىندە 33 قىلمىستىق قۇقىق بۇزۋشىلىق فاكتىسى انىقتالدى، 24 جالعان نەسيە راسىمدەلگەن، ال كەپىل رەتىندە 54 جوق وبەكت ۇسىنىلعان. سوت شەشىمىمەن مەملەكەت كىرىسىنە 19 تۇرعىن ءۇي، 10 جەر ۋچاسكەسى، 2 پاتەر، 4 كوممەرسيالىق ءۇي-جاي جانە 4 اۆتوكولىك تاركىلەندى. ۇكىم ازىرگە زاڭدى كۇشىنە ەنگەن جوق.